Fitorja e Listës Studentore në zgjedhjet parlamentare në Serbi ka hapur një kapitull të ri politik, me përgatitjet për form...
KOSOVA
Vrasja e Arlinda Zekajt në Pejë/ Prokuroria nis hetimet për zyrtarët, dyshohet për keqpërdorim të detyrës
PiranjatPërditësimi i fundit 26 Tetor 2026, 13:09
Prokuroria Themelore në Pejë ka nisur hetimet për të verifikuar nëse ka pasur veprime ose mosveprime të kundërligjshme nga zyrtarët në trajtimin e rasteve të mëparshme të Arlinda Zekajt, e cila u vra më 25 tetor.
Në një njoftim publik, Prokuroria sqaron veprimet institucionale të ndërmarra pas kërkesës së viktimës dhe bën të ditur se po punohet për zbardhjen e plotë të rrethanave të ngjarjes.
Sipas Prokurorisë, më 22 tetor, Kryeprokurorja kishte pranuar një kërkesë nga Arlinda Zekaj, ku ajo kishte ngritur pretendime lidhur me trajtimin e rasteve të mëparshme dhe kishte kërkuar zbatimin e një urdhri gjyqësor. Pas shqyrtimit të kërkesës, çështja iu adresua institucioneve përkatëse, përfshirë Policinë e Kosovës, Gjykatën Themelore në Pejë, Qendrën për Punë Sociale dhe Zyrën për Mbrojtje dhe Ndihmë Viktimave.
Prokuroria bëri të ditur se ka iniciuar një rast për të hetuar nëse veprimet ose mosveprimet e personave zyrtarë të përmendur në kërkesë përmbushin elementet e veprës penale të keqpërdorimit të pozitës apo autoritetit zyrtar.
Sipas dokumentacionit të referuar në kërkesën e Arlinda Zekajt, më 16 tetor gjykata kishte urdhëruar që ish-bashkëshorti i saj ta lejonte të kthehej dhe të shfrytëzonte shtëpinë e përbashkët. Gjithashtu, ishte lëshuar një urdhër mbrojtjeje për gjashtë muaj, i cili kishte hyrë në fuqi menjëherë.
Sipas Prokurorisë, zbatimi i urdhrit dhe njoftimi i gjykatës për zbatimin e tij ose për pengesat eventuale ishin përgjegjësi e Policisë së Kosovës.
Kur Arlinda kishte kërkuar kthimin në shtëpi, policia e kishte njoftuar prokurorin kujdestar. Pas vlerësimit të rrethanave dhe të rrezikut të mundshëm, prokurori kishte vlerësuar se kthimi i menjëhershëm mund të përbënte rrezik për jetën dhe sigurinë e saj.
Për këtë arsye, ai kishte kontaktuar vëllezërit e viktimës dhe e kishte udhëzuar që të qëndronte te familjarët. Arlinda kishte pranuar të shkonte tek ata, por kishte kërkuar që të nesërmen të shoqërohej nga një patrullë policore për t’u kthyer në banesë. Sipas Prokurorisë, ishte vendosur që patrulla të qëndronte në afërsi të shtëpisë gjatë kthimit të planifikuar.
Prokuroria njofton se më 23 tetor kishte ngritur aktakuzë ndaj ish-bashkëshortit të Arlindës, J.S., për veprën penale të kanosjes në kuadër të marrëdhënies familjare.
Më 25 tetor, rreth orës 19:48, policia kishte kontaktuar prokurorin kujdestar lidhur me një rast të dyshuar të dhunës në familje. Në stacionin policor ishin shoqëruar ish-bashkëshorti dhe Arlinda, ndërsa ndaj tij ishte iniciuar procedurë për veprën penale të mospërfilljes së gjykatës dhe ishte ndaluar për 48 orë.
Gjatë trajtimit të rastit, Arlindës i ishte ofruar mundësia për t’u vendosur në një strehimore, por ajo kishte refuzuar, duke kërkuar të kthehej në shtëpinë e përbashkët, ku ndodhej djali i saj dhe pasuria e saj.
Pas kësaj, ajo ishte shoqëruar nga një patrullë policore drejt shtëpisë, rreth orës 21:00. Pak minuta më vonë, prokurori kujdestar ishte njoftuar se Arlinda ishte goditur me një mjet të fortë brenda shtëpisë nga kunati i saj, A.S., i dyshuar për këtë rast.
Pas ngjarjes, në vendin e krimit kishin dalë njësitë përkatëse të Policisë së Kosovës, Kryeprokurorja e Prokurorisë Themelore në Pejë dhe prokurorja kujdestare e Departamentit për Krime të Rënda, për të ndjekur nga afër situatën dhe për të ndërmarrë veprimet fillestare hetimore.
Prokuroria bëri të ditur se Policia e Kosovës po ndërmerr veprime për lokalizimin dhe arrestimin e të dyshuarit A.S., i cili, në momentin e publikimit të njoftimit, ende nuk ishte arrestuar.
