Në 20 ditë protestë përpara Kryeministrisë, Edi Rama ka dalë disa herë për t’iu përgjigjur protestuesve. He...
LIFESTYLE
Franca kërkon bllokimin 3-mujor të Shein, Gjykata e Parisit vendos nesër fatin e gjigantit të “fast fashion”
PiranjatPërditësimi i fundit 25 Nëntor 2025, 13:42
Tensionet mes qeverisë franceze dhe platformës kineze Shein janë përshkallëzuar, duke çuar çështjen në Gjykatën e Parisit. Autoritetet franceze do t’i kërkojnë nesër gjykatës pezullimin e funksionimit të faqes së Shein për tre muaj, një masë e rrallë dhe tepër e ashpër ndaj një giganti ndërkombëtar online.
Procedurat nisën më 5 nëntor, pasi kontrollet zbuluan produkte të ndaluara që shiteshin në platformë, përfshirë kukulla seksi që dukeshin si fëmijë dhe objekte të ngjashme me armë. Zbulimi shkaktoi reagim të fortë nga institucionet franceze, të cilat akuzuan Shein për shkelje të rregullave të sigurisë dhe ofertim produktesh që bien ndesh me ligjin dhe normat morale.
Ironikisht, skandali shpërtheu në të njëjtën ditë kur Shein hapi dyqanin e saj të parë fizik në Paris, mes radhëve të gjata të klientëve dhe interesit të madh mediatik, duke krijuar një kontrast të thellë mes suksesit komercial dhe akuzave të rënda.
Pas reagimit të qeverisë, Shein i hoqi menjëherë produktet problematike dhe kërkoi të shmangë sanksionet, por autoritetet mbetën të vendosura. Tani, fjala e fundit i takon Gjykatës së Parisit, e cila nesër do të vendosë nëse Shein do të bllokohet për tre muaj.
Vendimi pritet të ndikojë edhe në marrëdhëniet gjithnjë e më të tensionuara mes BE-së dhe gjigantëve kinezë të “fast fashion”, që kritikohen për çështje sigurie, etikë dhe konkurrencë të pandershme.
