Detaje të reja janë zbuluar nga operacioni “Lulet e së keqes” të zhvilluar në Greqi, ku u sekuestruan 84 kg kokainë ...
LIFESTYLE
Kulti i trupit perfekt, Vatikani thotë "jo". Ja pse
PiranjatPërditësimi i fundit 5 Mars 2026, 17:21
“Dëshirohet një trup i përsosur, ndërsa ëndërrohet të iket nga trupi konkret dhe nga kufizimet e tij.” Këtë alarm e jep Komisioni Teologjik Ndërkombëtar, në një dokument të miratuar nga Papa Leone XIV, i cili paralajmëron për përdorimin e barnave dhe kirurgjisë me qëllime thjesht estetike. Trupi i njeriut, thuhet në dokument, nuk duhet të reduktohet “në një material biologjik për t’u riformuar sipas dëshirës” për të fshehur shenjat e kohës apo ndonjë të metë të vogël.
Por kulti i bukurisë, i përsosmërisë së trupit dhe “kërkimi i dëshpëruar për një figurë perfekte, që të mbetet gjithmonë në formë, e re dhe e bukur” shumë shpesh bëhen një obsesion i vërtetë, që arrin të ndikojë në marrëdhënien e secilit prej nesh me veten, me realitetin dhe me të tjerët. Me një kosto: jo vetëm ekonomike, por edhe – dhe ndoshta mbi të gjitha – psikologjike dhe shoqërore.
Komenti i Kishës
“Në këtë dinamikë – thekson dokumenti i teologëve – nuk është më e nevojshme të pranosh trupin tënd për të realizuar identitetin tënd. Ai mund të transformohet sipas shijeve të momentit. Krijohet kështu një situatë e çuditshme: trupi ideal lavdërohet, kërkohet dhe kultivohet, ndërsa trupi real nuk dashurohet vërtet, sepse konsiderohet burim kufizimesh, lodhjeje dhe plakjeje.”
Sidomos në Perëndim – thuhet në dokumentin “Quo vadis, humanitas? Të mendosh antropologjinë e krishterë përballë disa skenarëve mbi të ardhmen e njeriut” – “përparimet e kirurgjisë estetike, të kombinuara me farmakologjinë (trajtime hormonale, substanca që rrisin emocionet ose përqendrimin) ofrojnë mjete që ndryshojnë shumë marrëdhënien me trupin e vet dhe, rrjedhimisht, me realitetin dhe me të tjerët. Nga kjo lind një ‘kult i trupit’ i përhapur, që synon kërkimin e ethshëm të një figure perfekte, që të mbetet gjithmonë në formë, e re dhe e bukur”.
Teologët, megjithatë, theksojnë rëndësinë e zhvillimit dhe përparimit, por paralajmërojnë kundër idealizimit dhe kultit të përsosmërisë dhe bukurisë: “Duhet të vlerësohen përfitimet e dukshme për shëndetin dhe mirëqenien e shumë shtresave të popullsisë”, të arritura falë zhvillimit të bioteknologjisë, neuroshkencave dhe hartëzimit të ADN-së, së bashku me përparimet në fushën farmakologjike dhe të robotikës (cyborg).
Për shembull, “fushatat e parandalimit, diagnozat e hershme, llogaritja e rreziqeve të terapive të ndryshme apo e efekteve anësore të barnave në organizëm kanë përmirësuar shumë mundësitë e ndërhyrjes së mjekësisë dhe, rrjedhimisht, shëndetin publik”, thekson dokumenti.
Megjithatë, trupi nuk mund të reduktohet në një “material biologjik për t’u fuqizuar, transformuar apo riformuar sipas dëshirës, me ëndrrën për të arritur kushte ekzistence që shmangin dhimbjen, plakjen dhe vdekjen.” /PiranjatNews/
