Kongresmenja demokrate amerikane Alexandria Ocasio-Cortez ka reaguar lidhur me protestat në Shqipëri, duke i bërë thirrje qeverisë sh...
LIFESTYLE
Paralajmërimi i frikshëm që po vjen nga deti, shkencëtarët: 100 milionë ndërtesa do të zhyten nën ujë
PiranjatPërditësimi i fundit 7 Tetor 2025, 20:25
Një studim i ri i udhëhequr nga Universiteti McGill jep një paralajmërim tronditës për Jugun Global. Nëse nuk arrijmë të frenojmë shpejt emetimet e lëndëve djegëse fosile, rritja e nivelit të detit mund të vërë më shumë se 100 milionë ndërtesa në rrezik përmbytjesh të zakonshme.
Ky paralajmërim ekstrem vjen nga një studim i ri i udhëhequr nga Universiteti McGill në Kanada, i cili kreu një “analizë ndërtesë pas ndërtese” në shkallë të gjerë. Analiza mori në konsideratë ekspozimin ndaj infrastrukturës bregdetare në rajonet e Afrikës, Azisë Juglindore dhe Amerikës Qendrore dhe Jugore.
Sipas studimit, një rritje e nivelit të detit me vetëm 0.5 metra do të mjaftonte për të përmbytur rreth 3 milionë ndërtesa në vendet në jug të globit që përfshin Afrikën, Azinë Juglindore dhe Amerikën Qendrore e Jugore. Por nëse temperaturat vazhdojnë të rriten dhe shkrirja e akujve polarë përshpejtohet, niveli i detit mund të ngjitet deri në 5 metra brenda 100 viteve të ardhshme, duke rrezikuar një të gjashtën e ndërtesave në këto rajone.
Shkencëtarët theksojnë se edhe nëse respektohen objektivat e Marrëveshjes së Parisit, rritja me 0.9 metra është pothuajse e pashmangshme, duke vënë në rrezik rreth 5 milionë ndërtesa deri në vitin 2100.
Profesoresha Natalya Gomez paralajmëron se ky është “një proces i ngadaltë, por i pandalshëm”, i cili do të ndikojë për shekuj me radhë në popullsitë bregdetare. Sipas saj, nëse ngrohja globale nuk frenohet, niveli i detit mund të rritet deri në 20 metra, duke zhytur 136 milionë ndërtesa në të gjithë globin.
Studimi paralajmëron se përveç dëmeve fizike, pasojat ekonomike dhe logjistike do të jenë shkatërruese, pasi shumë porte, rafineri dhe qendra tregtare ndodhen pranë bregdetit, duke rrezikuar zinxhirët globalë të furnizimit me ushqime dhe energji.
