Dashi
Gjatë ditës mund të ndjeni nevojën për të ndryshuar diçka në rutinën tuaj. Sa i përket punës, ...
LIFESTYLE
Pse nuk rekomandohet kafja menjëherë pas mëngjesit?
PiranjatPërditësimi i fundit 17 Maj 2026, 08:24
Pirja e kafesë menjëherë pas mëngjesit është një rutinë që shumë njerëz nuk e shmangin dot, por ekspertët sugjerojnë se ky zakon mund të ndikojë në mënyrën si organizmi përthith disa minerale të rëndësishme, veçanërisht hekurin.
Sipas specialistëve të ushqyerjes, kafeja dhe çaji i zi përmbajnë substanca natyrale të quajtura tanine, të cilat mund të pengojnë përthithjen e hekurit gjatë procesit të tretjes. Kjo ndodh sepse taninet lidhen me hekurin e marrë nga ushqimi dhe e bëjnë më të vështirë kalimin e tij në gjak.
Ndikimi vërehet sidomos te hekuri jo-hemik, që gjendet kryesisht te ushqimet me bazë bimore si spinaqi, fasulet, drithërat apo perimet jeshile. Nëse kafeja konsumohet shumë pranë vakteve, trupi mund të mos përfitojë sasinë e nevojshme të hekurit nga këto ushqime.
Ekspertët paralajmërojnë se me kalimin e kohës kjo mund të ndikojë në nivelet e hekurit në organizëm, sidomos te personat që kanë predispozitë për mungesë hekuri ose anemi.
Një tjetër kombinim që rekomandohet të shmanget është ai mes hekurit dhe kalciumit. Produktet e qumështit, si qumështi apo djathi, mund të konkurrojnë me hekurin gjatë përthithjes në zorrë dhe të reduktojnë efektivitetin e tij.
Për këtë arsye, specialistët këshillojnë që kafeja, çaji dhe ushqimet e pasura me kalcium të konsumohen të paktën një ose dy orë larg vakteve kryesore, në mënyrë që organizmi të përthithë sa më mirë hekurin dhe mineralet e tjera të rëndësishme.
