Në prag të miqësores Shqipëri – Izrael, e cila do të mbahet sonte në stadiumin “Air Albania” të Tiran&...
LIFESTYLE
Rrjetet sociale për fëmijët po aq të dëmshme sa duhani
PiranjatPërditësimi i fundit 27 Maj 2026, 14:55
Mjekë në Britaninë e Madhe kanë paralajmëruar se ndikimi i rrjeteve sociale tek fëmijët dhe adoleshentët është bërë një shqetësim i madh shëndetësor, duke e krahasuar atë me rreziqe të njohura si pirja e duhanit apo mungesa e rripit të sigurimit në automjete.
Kjo u theksua nga “Academy of Medical Royal Colleges”, organizata që përfaqëson 23 kolegje dhe fakultete mjekësore në Britaninë e Madhe dhe Irlandë, sipas Reuters.
Në një raport të dorëzuar në konsultimin publik të qeverisë britanike për mbrojtjen e fëmijëve në internet, organizata argumenton se ekspozimi i pakufizuar ndaj teknologjisë dhe pajisjeve digjitale po shkakton pasoja serioze për shëndetin fizik dhe mendor të të rinjve.
Sipas saj, pak çështje kanë bashkuar profesionistët e shëndetësisë aq shumë sa ndikimi që po kanë aktualisht rrjetet sociale dhe pajisjet elektronike tek brezi i ri.
Një anketë e kryer mes 132 mjekëve tregoi se më shumë se gjysma e tyre hasin çdo javë të paktën një rast dëmtimi shëndetësor që mund të lidhet me përdorimin e teknologjisë, ndërsa mbi një e treta raportojnë raste të tilla disa herë në javë. Këto dëmtime përfshijnë si pasoja fizike, ashtu edhe probleme psikologjike.
Sipas raportit, dëmet fizike mund të lidhen me imitimin e sjelljeve të rrezikshme të parë në internet, ndërsa problemet mendore përfshijnë ankthin, traumën emocionale dhe ndikimin e përmbajtjeve të dhunshme ose shqetësuese që qarkullojnë në platformat sociale. Mjekët theksojnë se ekspozimi i vazhdueshëm ndaj këtyre materialeve mund të ndikojë negativisht në zhvillimin emocional të fëmijëve.
Debati po zhvillohet në një kohë kur qeveria britanike po shqyrton masa të reja për kufizimin e aksesit të të miturve në rrjetet sociale. Ndër propozimet janë ndalimi i përdorimit për fëmijët nën 16 vjeç, kufizime kohore gjatë natës, limite ditore të përdorimit të aplikacioneve dhe ndalimi i disa mekanizmave që konsiderohen varësues.
Ndërkohë, Australia është bërë vendi i parë në botë që ka miratuar një ndalim të rrjeteve sociale për përdoruesit nën moshën 16-vjeçare. Edhe disa vende evropiane po shqyrtojnë masa të ngjashme, ndërsa autoritetet britanike kanë sinjalizuar se janë të gatshme të ndërmarrin hapa të mëtejshëm përtej ligjit aktual për sigurinë online.
Sekretarja britanike për Teknologjinë, Liz Kendall, deklaroi se çështja nuk është më nëse do të ndërmerret veprim, por çfarë forme do të marrë ai, qoftë përmes një ndalimi të plotë për të miturit nën 16 vjeç apo përmes kufizimeve të veçanta mbi funksionet dhe karakteristikat e platformave sociale.
