Dashi
E diela fillon pak e përgjumur, por më pas forca dhe energjia kthehen pasdite. Mbrëmja do të jetë shumë e vlefshme për...
LIFESTYLE
Stokholmi drejt dhjetorit më të errët që nga viti 1934
PiranjatPërditësimi i fundit 22 Dhjetor 2025, 17:08
Stokholmi mund të përjetojë dhjetorin më të errët të regjistruar që nga viti 1934, pasi që nga fillimi i muajit janë regjistruar më pak se 30 minuta me diell.
Suedia, ashtu si edhe vendet e tjera nordike, janë mësuar me dimra të gjatë dhe të errët për shkak të pozicionit gjeografik verior. Megjithatë, sipas ekspertëve, ky dhjetor ka qenë jashtëzakonisht i pazakontë për kryeqytetin suedez, me qiell pothuajse vazhdimisht të mbuluar nga retë.
“Dhjetori ka qenë jashtëzakonisht i errët dhe me re në Stokholm,” tha për AFP meteorologu Viktor Bergman nga Instituti Meteorologjik dhe Hidrologjik suedez (SMHI).
Sipas tij, gjatë gjithë muajit kanë dominuar sisteme të paqëndrueshme me presion të ulët, duke sjellë mot të butë dhe të lagësht. “Qielli nuk ka pasur mundësi të pastrohet. Dielli ka qenë i dobët dhe rrezet e tij nuk kanë qenë në gjendje të shpërndajnë retë,” shpjegon Bergman.
Të dhënat klimatike tregojnë se mesatarja e orëve me diell në Stokholm për gjithë muajin dhjetor, bazuar në periudhën 1991–2020, është rreth 33 orë. Ndërkohë, deri tani janë regjistruar vetëm rreth 0.5 orë diell, një nivel që nuk është parë prej gati një shekulli, shkruan Afp.
Dhjetori më i errët i regjistruar ndonjëherë në kryeqytetin suedez daton në vitin 1934, dhe nëse kushtet aktuale vazhdojnë, ky rekord mund të barazohet ose edhe të thyhet.
