Gjykata Themelore në Prishtinë e ka dënuar me 12 vjet burgim Ekrem Bajroviqin, i akuzuar për krime lufte kundër popullatës civil...
POLITIKE
Ambasada Ruse 'përplaset' me Gonxhen dhe Ballën: Pretendimet për përfshirjen e Kremlinit në protesta, të pabaza
PiranjatPërditësimi i fundit 3 Korrik 2026, 17:54
Ambasada e Federatës Ruse në Tiranë ka reaguar ndaj deklaratave të ministrit të Turizmit, Kulturës dhe Sportit, Blendi Gonxhja, si edhe kreut të Grupit Parlamentar të Partisë Socialiste, Taulant Balla, të cilët kanë përmendur Rusinë si një nga aktorët që, sipas tyre, mund të ketë ndikim në protestat e zhvilluara në Shqipëri.
Në një deklaratë zyrtare, Ambasada Ruse i cilëson këto pretendime si "krejtësisht të pabaza", ndërsa shprehet se deklaratat e zyrtarëve shqiptarë dhe publikimet e disa mediave kanë ngjallur habi.
"Deklaratat e Ministrit të Turizmit, Kulturës dhe Sportit të Shqipërisë, B. Gonxhja, dhe deputetit të Parlamentit të Shqipërisë, Kryetarit të Grupit Parlamentar të Partisë Socialiste, T. Balla, në lidhje me 'përfshirjen e Kremlinit' në protestat që po zhvillohen në vend, ngjallin habi. Pretendime të ngjashme po shohim edhe në një numër mediash nga gazetarë të caktuar. Këto deklarata janë krejtësisht të pabaza", thuhet në reagim.
Ambasada thekson se Rusia ndjek parimin e mosndërhyrjes në punët e brendshme të shteteve të tjera dhe respekton zgjedhjet e popujve.
"Rusia zbaton me rreptësi njërin prej parimeve themelore të politikës së saj të jashtme: parimin e mosndërhyrjes në punët e brendshme të shteteve të huaja. Moska gjithmonë respekton zgjedhjen e popullit dhe punon me qeverinë e zgjedhur në mënyrë legjitime. Ne i urojmë sukses dhe begati popullit shqiptar, pavarësisht koniunkturës së krijuar politike dhe nivelit aktual të marrëdhënieve," vijon deklarata.
Në reagimin e saj, Ambasada Ruse shprehet gjithashtu se nuk është hera e parë që, sipas saj, politikanë shqiptarë akuzojnë pa baza Rusinë për ndikim në zhvillimet e brendshme politike.
"Me keqardhje vërejmë se kjo nuk është hera e parë që politikanët shqiptarë janë përpjekur t'i imponojnë publikut vendas në mënyrë të pabazë idenë e të ashtuquajturit 'ndikim dashakeq' të Rusisë. Ne bëjmë thirrje për një qasje më të përgjegjshme ndaj deklaratave të tilla dhe një përmbajtje nga kërkimi i armiqve aty ku nuk ekzistojnë," përfundon reagimi i Ambasadës Ruse.
