Momente tensioni u regjistruan gjatë ndeshjes mes Shqipërisë dhe Izraelit, menjëherë pas golit të shënuar nga skuadra mike. F...
POLITIKE
Berisha: Në këtë vend ku të gjitha pushtetet janë në duart e një njeriu, vetëm revolta kundër tij është rruga e vetme
E.DPërditësimi i fundit 9 Gusht 2024, 20:45
Sali Berisha
TIRANË- Kreu i Partisë Demokratike Sali Berisha gjatë fjalimit të tij para mbështetësve bëri thirrje për revolta pasi në këtë vend, të gjitha pushtetet janë në duart e një njeriu të vetëm. Më tej Berisha u bëri thirrje qytetarërve që të protestojnë te bashkia, të tjerët në Thumanë, të tjerët në Maliq sepse në këtë vend ku të gjitha pushtetet janë në duart e një njeriu, vetëm revolta dhe protesta kundër tij është rruga e vetme.
"Mirëmbrëma dhe përshëndetjet më të përzemërta. Nderimin tim më të madh, mirënjohjen më të pakufishme ju qëndrestareve dhe qëndrestarëve, misionarëve dhe misionareve të kauzës së drejtë të çdo shqiptari. Ju burrave dhe grave, të rinjve dhe të rejave, që protestoni me guxim, me revoltë, çdo ditë, çdo natë. Me shembullin tuaj, me qëndresën tuaj ju jeni shpresa e fundit. Ju jeni burimi i vetëm i frymëzimit të qytetarëve shqiptarë kundër një regjimi diktatorial. Një regjimi që ka vendosur mbi shqiptarët sundimin e krimit, drogës dhe vjedhjes së tmerrshme të qytetarëve shqiptarë. Miqtë e mi, protesta kundër formës më të egër, më të shëmtuar të diktaturave, të cilën Huntington, ky gjeni i historisë dhe sociologjisë e quan diktaturën e bandave, ju pra po zhvilloni betejën më të vështirë kundër diktaturës më të keqe.
Kundër asaj diktature, e cila si pushtim i brendshëm ka përzënë nga vendi rreth 40 përqind të qytetarëve shqiptarë. Kundër atij regjimi që varfëron shqiptarët çdo ditë, çdo muaj e më shumë dhe i largon ata në dhera të huaja. Shkreton këtë vend më shumë se çdo pushtim i huaj. Më shumë se çdo epidemi në historinë e tij. Miqtë e mi, ju protestoni çdo natë. Ju protestoni te bashkia. Të tjerët protestojnë në Thumanë, të tjerët në Maliq sepse në këtë vend ku të gjitha pushtetet janë në duart e një njeriu, vetëm revolta, vetëm protesta kundër tij është rruga e vetme. Është rruga e vetme për të mos u shndërruar në fasadë të regjimit më kriminal që Shqipëria ka pasur në tërë historinë e saj," tha Berisha.
