Një ngjarje e rëndë ka ndodhur në zonën e Lozhanit në Maliq ku një efektiv i forcave ‘Shqiponjave’ ka mbetur i ...
POLITIKE
Berisha: Pronarëve në Tiranë po u bëhet presion me mafiozë dhe me shtet për tu marrë pronat
r.llPërditësimi i fundit 19 Mars 2025, 20:57
TIRANË- Kryetari i Partisë Demokratike, Sali Berisha tha sot gjatë prezantimit të programit qeverisës të PD-së për pronat, se në Tiranë po ushtrohet presion ndaj pronarëve të tokave, nga mafia dhe shteti, me qëllim që të ndërtohen kulla.
Berisha tha se Shqipëria ka çdo mundësi që problemet e trashëguara me pronarët legjitimë dhe me të përndjekurit politikë t’i mbyllë gjatë 4 viteve që vijnë.
Ai tha se nuk mund të imagjinohet në çfarë shkalle ka vjedhur qeveria Rama qytetarët, ndërsa shtoi se në 12 vite ka mbledhur 65 miliardë euro taksa të cilat i ka përvetësuar.
PJESË NGA FJALA E BERISHËS:
Normat e vlerësimit dhe të kompensimit do të jenë ato të tregut dhe vetëm të tregut. Prona private, do mund të zhvillohet mbi bazën e interesave të pronarit dhe para së gjithash, interesave të pronarit. Në qoftë se, paskemi një projekt te Asllan Rusi, jepu pronarëve 40, 50% të atij projekti siç u takon. Nuk të pengojnë ata. Po përdorimi i tyre, trysnimi i tyre me mafiozë, me shtet, me të gjitha mënyrat është një persekutim i vërtetë i dytë politik që iu bëhet.
Panelistët kanë bërë një punë shumë të çmuar. Janë njerëz që e njohin në themel pronën, parimin, ligjin e pronës dhe pronësisë. Do japin ekspozetë e tyre, dhe i garantoj se çdo pronar është i ftuar të japë mendimin për zgjidhjen përfundimtare të këtij problemi në 4 vitet që vijnë. Shqipëria ka çdo mundësi që problemet e trashëguara me pronarët legjitimë dhe me të përndjekurit politikë t’i mbyllë gjatë 4 viteve që vijnë, dhe do t’i mbyllë ato.
Miqtë e mi, askush nuk mund ta imagjinojë se në çfarë shkalle kanë vjedhur këta qeveritarë qytetarët. Qeveria e Edi Ramës ka mbledhur në 12 vite 65 miliardë euro taksa. Ka shpenzuar gjithësej në 12 vite rroga, 8 miliardë euro. Pra, 57 miliardë euro, ku janë? Çdo shqiptar duhet të pyesë vetën, sa kushtonte kompensimi i pronarëve? Shifrat e larta shkojnë tek 800 milionë. Por ta zëmë 1 miliardë, po ta zëmë 1.5 miliardë. Po në këto 57 milionë, nuk mund të kishin pronarët atë që u takonte? Nuk mund të kishin të përndjekurit atë që iu takonte?
Është përvetësuar dhe vjedhur në mënyrë që imagjinata nuk e rrok dot. Pllakat e gurëve që janë shtruar në 61 sheshe qytetesh janë 2.3 miliardë euro. Në një kohë që, absolutisht në çdo lloj lapsi t’i biesh nuk shkojnë kurrë më shumë se 300 milionë euro. Pra, u ndala në këto shifra, jo për propagandë, por u ndala për t’iu thënë shqiptarëve dhe për t’iu thënë pronarëve se, potenciali është i plotë për t’i dhënë zgjidhje përfundimtare detyrimit madhor të qeverisë shqiptare ndaj detyrimit të pronarëve, detyrimit madhor të qeverisë shqiptare ndaj ish të përndjekurve politikë.
