Kreu i PD Sali Berisha është kthyer në Tiranë pas vizitës në SHBA, ku në një prononcim të shkurtër nga Rinasi ...
POLITIKE
Berisha: Rama i ka shpallur luftë drejtësisë! Do t’i përgjigjemi me protesta të fuqishme me moton 'ja vdekje, ja liri'
PiranjatPërditësimi i fundit 3 Janar 2026, 12:49
Kreu i opozitës shqiptare, Sali Berisha, gjatë një bashkëbisedimi me qytetarët në Facebook, akuzoi kryeministrin Edi Rama se i ka shpallur luftë sistemit të drejtësisë. Berisha paralajmëroi protesta të reja të fuqishme të opozitës, duke theksuar se beteja do të zhvillohet nën moton “ja vdekje, ja liri”.
Pjesë nga bashkëbisedimi me qytetarët:
Viti i ri në Shqipëri nis në një kohë kur, në prag të tij, Edi Rama, apo “Ramaduro”, i ka shpallur luftë të hapur sistemit të drejtësisë dhe ka pranuar të gjithë fajësinë e tij. Cilido që ndoqi monologun e tij treorësh kuptoi dy gjëra: se ai pranon të gjitha vjedhjet që u ka bërë shqiptarëve, por në një gjuhë oruelliane nuk i konsideron vjedhje, por veprimtari të ligjshme të tij si kryeministër. Për këtë arsye ai mori në mbrojtje të paskrupullt dhe të hapur Belinda Ballukun, si dhe Mirlindën e AKSHI-t, për të cilën deklaroi se kishte respekt maksimal.
Natyrisht, njeriu që ka drejtuar qindra milionë euro në arkat dhe kontot e familjes Rama nuk ka si të mos ketë respekt maksimal nga Edi Rama. Por ajo që spikati në këtë fjalim dhe që përbën një zhvillim dramatik për vendin është lufta e hapur kundër sistemit të drejtësisë. Rama u zotua se nuk do të pranojë vendimet e prokurorisë dhe gjykatave për rrethin e tij familjar, për veten dhe ministrat e tij.
Në këtë kontekst, mbetet vetëm zëri i opozitës. Po shkohet drejt një grushti të plotë shteti, ku pushteti ekzekutiv paralizon dhe merr nën kontroll pushtetin gjyqësor.
Atëherë fjalën e ka populli dhe vetëm populli. Kjo situatë na fton dhe nuk na gjen aspak të papërgatitur. 22 dhjetori provoi se ku ishim dhe ku jemi si opozitë, si Partia Demokratike. Provoi se jemi një shumicë politike në Shqipëri, të gatshëm për t’u përballur me Edi Ramën në një betejë përfundimtare për rikthimin e votës së lirë. Të gjitha të dhënat tregojnë se Edi Rama nuk do të pranojë verdiktin e organeve të drejtësisë dhe, në këtë mënyrë, de facto merr edhe atë pak pushtet të pavarur që kishte mbetur në sistem, duke u shndërruar në një diktator të pushtetit absolut.
Ndaj edhe përgjigjja jonë do të jetë absolute. Do të përgatitemi për protesta të reja, të fuqishme, nën moton “ja vdekje, ja liri”. Dhe ne do të fitojmë.Sa herë që kemi përdorur këtë moto, kur liritë tona janë kërcënuar për vdekje, kemi triumfuar. Ka ndodhur në vitin 1991, 1998, 1999 dhe po ndodh edhe tani, në mënyrën më të paimagjinueshme, pas 35 vitesh pluralizëm.
Duke uruar edhe një herë Vitin e Ri, i ftoj qytetarët të betohemi për misionin tonë të ri: largimin e “Ramaduros” nga pushteti, zgjedhje të lira dhe opozitën në pushtet.
Rilindja është në vdekje klinike, një kalbësirë që kundërmon në mbarë vendin, në Europë dhe në botë. Edi Rama është një kufomë politike që kundërmon në Europë dhe në botë. Na takon ne t’i groposim në banesën e turpit të historisë.
