Në kulmin e protestave kundër projektit turistik në Zvërnec, kryeministri Edi Rama ka mbërritur këtë të premte në...
POLITIKE
Debat në Kuvend për licencimin e mësuesve, Zhupa-Kumbaros: Erdhe ti dhe na shpike rrotën!
PiranjatPërditësimi i fundit 23 Prill 2026, 13:08
Deputetja Ina Zhupa u përplas me ministren e Arsimit, Mirela Kumbaro për licencës e mësuesve, ku demokratja u akuzoi Ministrinë se po rëndon sistemin arsimor me udhëzime që, sipas saj, krijojnë burokraci dhe paqartësi për mësuesit.
Ajo u shpreh se mësuesit me përvojë të gjatë detyrohen të rikthehen në procese licencimi, duke e quajtur këtë “absurditet”.
Ministrja Mirela Kumbaro u përgjigj duke theksuar se procesi i licencimit të mësuesve nuk është i ri, teksa sqaroi se ushtrimi i profesionit të mësuesit lidhet me përmbushjen e praktikës profesionale dhe kalimin e provimit të shtetit, sipas ligjit për profesionet e rregulluara.
Ina Zhupa:2000 mësues në sistemin arsimor. Këta mendojnë se si të shtojnë hallet dhe problemet e mësuesve me udhëzimet e vetë ministrisë. Kujtohen dhe thonë, pasi ke 15 vite si mësues, pasi ke kaluar fazat nga mësues i kualifikuar, në specialist dhe më pas mësues mjeshtër, këta thonë “shko bëhu edhe njëherë student dhe jep provim licence”. Mësuesit me 15 vite në sistem, i detyrojnë të futen për të marrë kualifikimin si mësues mjeshtër për provim licence. Je student, mbaron shkollën, futesh bën licencën dhe për tre vite ke të drejtë të kualifikohesh si “mësues i kualifikuar”, pas gjashtë vitesh si “mësues specialist” dhe pas 15 vitesh si “mësues mjeshtër”. Me këtë logjikë i bie që edhe nxënësit t’i kthejmë dhe të bëjnë provimin?! Janë absurditete, të cilat ju i bëni me qëllim duke ngatërruar kriteret e punësimit me ato të kualifikimit.
Erdhe ti tani dhe shpike rrotën që këta duhet të jenë të licencuar, se kështu ta lexojnë ata juristët e paaftë që ke në ministri, apo ato drejtoreshat që i ke të kërkuara, arrest shtëpie, dhe të bëjnë këto lloj udhëzimesh. Është shembje e sistemit juridik.
Kumbaro: Më vjen keq që një grup deputetësh nuk i shoh në sallë, do të thotë nuk janë të interesuar, por paskan firmosur një kërkesë për interpelancë pa qenë fare të interesuar. Detyrimi për licencimin e mësuesve ka filluar që me miratimin e ligjit nr. 69/2012. Mësuesi i arsimit fillor, i arsimit të mesëm të ulët dhe i arsimit të mesëm të lartë, mësuesi i shkollave të arsimit të orientuar, mësuesi i kulturës së përgjithshme në shkollat profesionale, mësuesi që punon me nxënësit me aftësi të kufizuara dhe mësuesi me diplomë të ngjashme ose të përafërt me diplomat në fushat/lëndët e mësimdhënies në arsimin parauniversitar ushtron profesionin pasi: të ketë kryer me sukses praktikën profesionale; të ketë kaluar me sukses provimin e shtetit në fushën e formimit të tij, siç parashikohet në ligjin nr. 10 171, datë 22.10.2009, “Për profesionet e rregulluara në Republikën e Shqipërisë”, të ndryshuar, dhe në aktet nënligjore të nxjerra në zbatim të tij.
Dhënia e provimit të shtetit nuk është një pengesë, por një garanci, një instrument që vendos barazi për të gjithë ata që hyjnë në profesion, duke siguruar që çdo mësues të përmbushë të njëjtat standarde profesionale, pavarësisht kohës apo mënyrës së hyrjes në sistem. Është e rëndësishme të qartësohet se ky proces nuk synon të krijojë pasiguri apo të penalizojë askënd, por të ndërtojë një sistem më të drejtë dhe më të qëndrueshëm në afatgjatë. Dhe mbi të gjitha, dua ta them shumë qartë: nuk po hiqet askush nga puna! Por po shoqërojmë me komunikim dhe trajnim edhe ata pak mësues që ende nuk e kanë kryer këtë detyrim ligjor, pa u cenuar aspak sigurinë juridike apo profesionale, që nuk e di se nga e shpikët! Nuk ka asnjë politikë, asnjë vendim dhe asnjë nismë që synon largimin e mësuesve nga vendet e tyre të punës për shkak të këtij procesi.
