L
Një plagosje me thikë ka ndodhur rreth mesditës në Durrës, në zonën e Shkozetit. Një i ri, rreth 25 vjeç, &eum...
POLITIKE
“Garda veproi sipas ligjit”/ Berisha: Rama i solli protestuesit si mish për top, sot derdh lotë krokodili
PiranjatPërditësimi i fundit 21 Janar 2026, 13:52
Kreu i Partisë Demokratike, Sali Berisha, është pyetur sot nga mediat për ngjarjen e 21 janarit 2011, ku ka ripërsëritur qëndrimet e tij lidhur me protestën që përfundoi me katër viktima para Kryeministrisë.
Berisha u shpreh se i ka thënë të gjitha lidhur me këtë ngjarje dhe se ka dëshmuar edhe në prokurori, duke e cilësuar 21 Janarin si “protestën më të dhunshme në historinë e vendit”, të dokumentuar dhe të faktuar. Sipas tij, protesta kishte një axhendë të qartë politike, fakt që, siç tha, provohet edhe nga dokumente ndërkombëtare.
Ai akuzoi kryeministrin Edi Rama si përgjegjësin kryesor për organizimin e protestës, duke e lidhur atë me, sipas tij, falsifikimin e një regjistrimi audio të bërë nga Dritan Prifti.
Berisha pretendoi se në atë regjistrim ishte deformuar qëllimisht kuptimi i bisedës mes Ilir Metës dhe Dritan Priftit, duke e paraqitur sikur Meta kërkonte 700 mijë euro, ndërkohë që, sipas tij, bëhej fjalë për kompensimin e një kompanie që kishte pësuar humbje pas një vendimi gjykate.
“Rama është përgjegjësi kryesor për falsifikimin e dokumentit dhe për thirrjen e një proteste të dhunshme me axhendë të caktuar,” deklaroi Berisha, duke shtuar se i ishte kërkuar atij zgjidhje politike me kërcënimin se “do të kalohej mbi kufoma”.
Berisha i cilësoi si “lot krokodili” reagimet e Ramës për viktimat e 21 Janarit, duke pretenduar se protestuesit u përdorën “si mish për top për pushtetin”. Ai tha se ish-kryeprokurorja Ina Rama e hetoi çështjen, por sipas tij nuk guxoi kurrë të thërrasë për hetim Edi Ramën.
Në vijim, Berisha deklaroi se Garda e Republikës ka vepruar në përputhje me ligjin dhe se janë dënuar disa persona, por sipas tij, Rama po përpiqet t’i përdorë viktimat për të shpëtuar veten dhe bashkëpunëtorët e tij.
