Pamje të rënda janë publikuar nga protesta studentore në Tiranë. Siç shihet edhe në video, një i ri nga Tirana ...
POLITIKE
Kurti i thirrur si dëshmitar/ Gjykata e Prishtinës: Morëm kërkesë nga Prokuroria që të paraqitet
M.B.Përditësimi i fundit 19 Shkurt 2025, 10:45
KOSOVA- Prokuroria Speciale e Kosovës i ka dërguar kërkesë në Gjykatën Themelore të Prishtinës për të urdhëruar paraqitjen e Kryeministrit Albin Kurtit si dëshmitarë për rastin e rezervave shtetërore. Bëhet me dije se kërkesa është dërguar javën e shkuar teksa Departamenti Special i Gjykatës Themelore konfirmon pranimin e kërkesës dhe thotë se është duke e shqyrtuar.
“Konfirmojmë se Gjykata Themelore në Prishtinë – Departamenti Special ka pranuar kërkesën në fjalë nga Prokuroria Speciale e Republikës së Kosovës, e njëjta është duke u shqyrtuar nga gjykata", thotë Gjykata.
Kryeministri i Kosovës Albin Kurti është thirrur si dëshmitar në dhjetor të 2024 për t’u paraqitur në Prokurorinë Speciale për të dhënë dëshminë e tij për rastin e keqpërdorimit me rezervat shtetërore. Kurti nuk u paraqit në këtë në atë kohë pasi ndodhej jashtë vendit. Gjithashtu Kurti pati deklaruar se dëshminë mund ta japë nga zyra e tij në kryeministri.
“Unë guxoj t’ju them s’po vij. Ta shohim tash a guxojnë ata të vijnë", tha Kurti.
Kjo mundësi u hodh poshtë nga kryeprokurori i Prokurorisë Speciale, Blerim Isufaj. Kjo bëri që Kurti ta cilësonte Isufajn edhe si regjisor të një skenari ku kryeministri i vendit shfaqej duke hyrë brenda objektit të Prokurorisë Speciale për intervistim.
Nëse edhe këtë herë, Kurti refuzon të shkojë për të dhënë dëshminë e tij, ai mund të gjobitet deri në 250 euro. Gjithashtu mësohet se mund të bëhet edhe një ftesë tjetër për të, në rast të refuzimit edhe për këtë, Kurti mund të vihet në paraburgim.
