Sali Berisha ishte sot në Fier në kuadër të turit të tij të Foltoreve të Ripërtëritjes ku foli edhe për seancën e mbrëmshme në parlament, ku mazhoranca votoi me 85 vota reformën territoriale. Kryedemokrati u shpreh se socialistët bën një teatër absurd, ndërsa i quajti si “kriminelë gjakftohtë”.
Më tej ai kritikoi edhe deputetin Vullnet Sinaj që fillimisht u raportua se do votonte kundër reformës, por më pas e ktheu sepse sipas Berishës, pa interesin e tij privat dhe jo atë të qytetarëve.
“15 bashki, 2 nga të cilat në qarkun e Fierit, Patosi dhe Divjaka dhe 13 të tjera po të kishin shpirt do të thoshin po ekzekutoheshin në sallën e parlamentit nuk kishte krim më të shëmtuar. Çfarë ka Divjaka që nuk mund të jetë bashki? Pasuri mahnitëse natyrore në vetvete. Kurorë e fermerëve shqiptarë. Janë të parët fermerët që marrin prodhimet dhe i eksportojnë në të 4 anët e Europës. Çfarë ka ky qytet për të mos qenë bashki? Në një kohë kur kanë të gjitha pasuritë për ti zhvilluar, për të begatuar banorët. E patë atë deputetin e Divjakës. As ai nuk ishte aty. Kryetari që i nxori qytetarët një muaj në protestë, dje nuk u duk. Skllevër të pasurive të tyre të paligjshme, të vjedhjeve që u kanë bërë qytetarët. Asgjë më urgjente nuk ka se sa krijimi i një agjencie kombëtare për konfiskimin e çdo pasurie të paligjshme. Për rikthimin te qytetarët.
Dilnin dhe diskutonin një nga një personazhe të një romani mbi të keqen banale. Përçues të së keqes. Divjaka aty do jetë, shiko çfarë mendje. Klosi aty do të jetë, prandaj nuk ka gjë se nuk është bashki. Shqiptarët përjetuan një teatër absurd. Të gjitha interesat e tyre kriminale kundër qytetarëve. Ne nuk po mbronim mbi asnjë bazë partiake. Ne po mbronim qytetarin. Sepse qytetari ku është duhet të ketë vetëqeverisjen e tij. Mësimi është që ne duhet të angazhohemi kundër kësaj të keqeje të madhe me çdo qytetar. Duhet të angazhohemi intensivisht.
Ata që ndoqën mbrëmë seancën panë se ç’kriminel gjakftohtë ishin ata deputetë. Duke brohoritur u hoqën qytetarëve 15 qeveri. Dhe arritën në atë shumësi votash duke bërë kërcënimet më mafioze njëri tjetrit. Dilte deputeti i Selenicës ku ka një komunitet vllah dhe nuk e thoshte. Edhe ata një minoritet i nderuar. Dhe ky tani jo që nuk mbronte banorët por mbronte big market të tij. Dolën me 85 vota triumfator mbi ne. Mbi qytetarët. Dhunues të qytetarëve. Ne duhet të kthehemi te qytetarët.”- tha Berisha.
