Senatorja amerikane Elissa Slotkin (Demokrate nga Miçigani) ka reaguar në rrjetin social X lidhur me dhunën policore në protestën stu...
POLITIKE
"Ministrja e Brendshme nuk pranon përgjegjësi"/ Deputetja demokrate: KLGJ ka kërkuar që prej dy vitesh rritjen e masave të sigurisë në gjykata
PiranjatPërditësimi i fundit 8 Tetor 2025, 15:08
Deputetja e Partisë Demokratike, Elda Hoti, e ftuar në një studio televizive, ka folur për vrasjen e gjyqtarit Astrit Kalaja në Gjykatën e Apelit më 6 tetor, duke e cilësuar këtë ngjarje si një kambanë alarmi dhe një tregues të dështimit të plotë të sigurisë në vend.
Hoti theksoi se përgjegjësia kryesore për këtë situatë i takon qeverisë dhe institucioneve shtetërore, duke kritikuar drejtpërdrejt ministren e Brendshme, Albana Koçiu, për mungesën e përgjegjësisë dhe për refuzimin e dorëheqjes pas këtij tragjedie. Sipas saj, kërkesat e Këshillit të Lartë Gjyqësor (KLGJ) për rritjen e masave të sigurisë në gjykata nuk janë marrë seriozisht nga Policia e Shtetit dhe autoritetet.
“I vetmi shtet ku nuk mbahet përgjegjësi. Ministrja e Brendshme duhet të kishte dhënë dorëheqjen pas ngjarjes. Vrasja e gjyqtarit është një kambanë alarmi për çdo qytetar shqiptar. KLGJ ka kërkuar që prej dy vitesh rritjen e masave të sigurisë në gjykata, por masat nuk u morën. Përgjegjëse është qeveria dhe institucionet shtetërore,” tha Hoti.
Ajo paralajmëroi se kjo situatë po i çon qytetarët drejt vetëgjyqësisë, duke shtuar se Shqipëria është i vetmi vend ku drejtorin e policisë e emëron krimi. “Është e papranueshme që në vendin tonë të vritet një gjyqtar brenda sallës së gjykatës. Kjo tregon qartë gjendjen alarmante të sigurisë. Ministrja e Brendshme nuk pranon përgjegjësi, duke thënë se policia nuk ka detyrë të ruajë gjykatat. Kjo është një situatë që çon qytetarët në vetëgjyqësi,” shtoi ajo.
Deputetja demokrate akuzoi edhe kryeministrin Edi Rama për dështimin në sigurimin e rendit, nivelin e lartë të korrupsionit dhe kapjen e institucioneve. Sipas saj, Rama ka degraduar situatën ekonomike dhe sociale, duke e vënë vendin në një krizë të thellë besimi dhe sigurie.
“Edi Rama i vjedh zgjedhjet dhe nuk i fiton me votë. Raporti i DASH tregon qartë se ekonomia është e kapur nga krimi, ndërsa investitorët e huaj largohen sepse nuk ndihen të sigurt,” tha deputetja demokrate.
Në vijim, Hoti tha se mazhoranca rrëzoi kërkesën e opozitës për ngritjen e Komisionit të Posaçëm Parlamentar që të hetojë vjedhjen e fondeve të IPARD-it, duke e akuzuar kryeministrin se nuk dëshiron që e vërteta të dalë në dritë. Ajo theksoi se korrupsioni po dëmton rëndë sektorin e bujqësisë dhe fermerët shqiptarë, përfitimet duke shkuar në xhepat e klientëve politikë.
