Ekziston mundësia e një takimi me Presidentin e Shteteve të Bashkuara të Amerikës, Donald Trump, në Kinë, tha sot President...
POLITIKE
Nis krisja në qeveri/ Rama lëshon Ballukun pas shpalljes së saj të pandehur nga SPAK. Detajet që nuk u panë
PiranjatPërditësimi i fundit 26 Tetor 2025, 12:00
Menjëherë pas shpalljes së Belinda Ballukut si të pandehur, ka ardhur edhe krisja e parë midis zëvendëskryeministres dhe Edi Ramës. Pasi doli lajmi se numri dy i qeverisë ishte shpallur e pandehur nga SPAK, në dy postimet që Belinda Balluku ka publikuar në rrjetet sociale, në asnjërën prej tyre Rama nuk ka pranuar tagun që ajo i ka dërguar.
Është e habitshme, sepse para se SPAK të fliste, çdo shkrim apo postim që Balluku publikonte shpërndahej automatikisht nga Kryeministri, një zakon që nuk vazhdoi më pas vendimit të organeve ligjzbatuese.
Njëri prej postimeve që Rama nuk ka pranuar është videoja e Ballukut nga Zvicra, ku ajo ka bërë publike aktivitetet e saj. Në postimin tjetër bëhet fjalë për mirëmbajtjen estetike të rrugëve.
Rama po distancohet fillimisht në rrjetet sociale, ashtu siç ka ndodhur rëndom me të gjithë ata që kanë pasur probleme me drejtësinë.
SPAK pritet t’i komunikojë zyrtarisht akuzën numrit dy të qeverisë, e përfolur për një sërë aferash, veçanërisht për Tunelin e Llogarasë, ku me një të rënë të lapsit u gllabëruan rreth 50 milionë euro. Ndërsa në shumë raste të tjera, kryeministri ka lëshuar para drejtësisë ata që i kishte “siktirosur” nga rrethi i vet, ende nuk dihet se si do të veprojë me Ballukun.
“Nuk kam asnjë koment për asnjë rast, sepse, siç e kam thënë, ne kemi punën tonë, drejtësia ka punën e vet,” — deklaroi Rama në një intervistë për Deutsche Welle të shtunën.
“Deri kur çështje të caktuara të marrin formën e tyre të prerë, të gjithë njerëzit janë të pafajshëm dhe të padënueshëm nga gjykata popullore e politikës dhe mediave që i shërbejnë politikës,” — shtoi ai.
Që prej së premtes, kur doli lajmi se zëvendëskryeministrja Belinda Balluku ishte nën hetim nga SPAK dhe se pritej të thirrej në Prokurorinë e Posaçme bashkë me një avokat, nga mazhoranca nuk ka pasur asnjë reagim zyrtar. Vetë Balluku ndodhej në Zvicër, ku përcolli një mesazh për zhvillimin e rrjetit hekurudhor, por asnjë fjalë për hetimet ndaj saj.
