Ka nisur protesta e pestë në mbrojtje të Zvërnecit, ku qytetarët kundërshtojnë projektin për ndërtimin e një r...
POLITIKE
Parlamenti miraton me konsensus ndryshimet në Rregulloren e Kuvendit, vetëm një deputet votoi kundër
PiranjatPërditësimi i fundit 21 Maj 2026, 21:54
Kuvendi i Shqipërisë ka miratuar me 100 vota pro ndryshimet në Rregulloren e Kuvendit, ndërsa më herët gjatë ditës, palët e miratuan atë me konsensus në Këshillin për Rregulloren.
Rregullorja u miratua nga mazhoranca dhe opozita, ndërsa votoi kundër vetëm deputeti Redi Muçi.
Demokratët janë tërhequr nga kërkesa për krijimin e Komisionit parlamentar të Integrimit, socialistët kanë miratuar propozimin e tyre që Sekretariati i Etikes të ketë 6 anëtarë me ndarje të barabartë.
Gjithashtu, socialistët janë tërhequr nga përgjysmimi i kohës së diskutimit në seancë plenare për deputetët si dhe nga propozimi që institucionet kushtetuese të mos raportonin në seancë plenare, duke pranuar kështu qëndrimin e PD-së. Socialistët janë tërhequr gjithashtu nga propozimi që institucionet të raportojnë vetëm te komisioni Xhafaj, duke rënë dakord që ky raportim të zhvillohet në komisionet përkatëse parlamentare.
Gjithashtu, palët kanë rënë dakord për forcimin e kontrollit parlamentar përmes ndërhyrjes së Kryetarit të Kuvendit në rastet kur institucionet nuk u përgjigjen kërkesave të deputetëve për informacion si dhe kryetarët e komisioneve, kur kërkohet nga pakica parlamentare, të jenë të detyruar të thërrasin mbledhje komisioni ose seanca dëgjimore me titullarë institucionesh brenda dy ditëve nga paraqitja e kërkesës.
Një tjetër propozim ku palët kanë rënë dakord është që seancat plenare maratonë të mos zgjasin përtej orës 22:00 siç ka ndodhur deri më tani, por të ndërpriten dhe të rifillojnë ditën pasardhëse. Një tjetër pikë ku palët kanë rënë dakord është edhe masa ndaj deputetëve që ndëshkohen për shkelje të rregullores, duke bërë që kjo masë të pezullohet nëse ankimohet në Byronë e Kuvendit.
