Një sherr i dhunshëm është shënuar rreth orës 23.00 të së premtes në lagjen nr. 3 të qytetit të Sarand&eu...
POLITIKE
“SPAK të nisë hetimet”/ PD: Skandali Qukës-Qafë Plloçë, miliona të shpërdoruara
PiranjatPërditësimi i fundit 27 Nëntor 2025, 12:05
Zëdhënësja e Antikorrupsionit në Partinë Demokratike, Genta Vangjeli, ka ngritur akuza të rënda ndaj qeverisë lidhur me projektin e ndërtimit të rrugës Qukës–Qafë Plloçë, të cilin e cilësoi si “një histori abuzimesh, vonesash dhe shpërdorimi të milionave eurove të fondeve publike”.
Sipas PD-së, rruga 40.5 kilometra, e ndarë në tre lote me një vlerë të vlerësuar prej 152 milionë dollarësh dhe e financuar nga Banka Islamike për Zhvillim, Fondi Saudit për Zhvillim dhe Qeveria Shqiptare, është shndërruar në simbol të korrupsionit dhe keqmenaxhimit qeveritar. Punimet, që duhej të përfundonin që në vitet 2017–2018, u zvarritën për 7–8 vite, duke rritur kostot me të paktën 60 milionë dollarë shtesë.
Vangjeli theksoi se, përtej kostove të ndërtimit, janë kryer edhe dy procedura për shërbime konsulence me vlerë 5.6 milionë euro, ndërsa ARRSH ka pasur “mangësi të theksuara” në projektim dhe menaxhim, veçanërisht në lotin 3. Ajo kujtoi se Kontrolli i Lartë i Shtetit kishte paralajmëruar që në vitin 2019 për problematikat serioze të projektit, por paralajmërimet janë injoruar.
PD shprehet se mbi të njëjtin aks janë mbivendosur fonde të tjera përmes gjashtë kontratave të prokuruara nga ARRSH që nga viti 2018, me një vlerë totale prej 2.4 milionë eurosh. Fituesi më i fundit i shpallur më 20 nëntor, kompania “2T shpk”, është sipas PD-së në pronësi të vëllait të kryebashkiakut të Tepelenës—çka, sipas opozitës, ngre dyshime për klientelizëm dhe gara të paracaktuara.
PD tregon gjithashtu se pas rrëshqitjes së skarpatave dhe dëmtimit të rëndë të rrugës vetëm dy muaj pas inaugurimit, kompania 2T ka nisur punimet pa një kontratë të publikuar në sistemin e prokurimeve. Po ashtu, opozita denoncon se rruga është hapur pa procedurë kolaudimi, duke e quajtur këtë një shkelje që “vë në rrezik jetën e qytetarëve”.
Partia Demokratike kërkon që SPAK të nisë menjëherë hetimet për këtë çështje, të identifikojë personat përgjegjës dhe të sigurojë llogaridhënie për fondet e shpërdoruara.
“Shqiptarët meritojnë transparencë, siguri dhe institucione që punojnë për ta, jo projekte të dështuara, kosto të fryra dhe korrupsion të pandëshkueshëm,” deklaroi Vangjeli.
Deklarata e plotë:
Projekti i ‘Ndërtimit të rrugës Qukës-Qafë Plloçë’, një histori abuzimesh, vonesash dhe shpërdorimi të miliona eurove të fondeve publike, që ka kulmuar me dëmtimin e rëndë të rrugës vetëm dy muaj pas inaugurimit propagandistik të Kryeministrit Edi Rama.
Projekti me gjatësi 40.5 km, i ndarë në tre lote, me vlerë të vlerësuar 152 milionë dollarë, financuar nga Banka Islamike për Zhvillim, Fondi Saudit për Zhvillim dhe Qeveria Shqiptare, është kthyer në simbolin e dështimit dhe korrupsionit qeveritar.
Edhe pse lotet 1 dhe 2 duhej të kishin përfunduar në vitin 2018 dhe loti 3 në vitin 2017, asnjë prej tyre nuk u finalizua në kohë. Rruga u hap me 7-8 vite vonesë, duke rritur kostot me të paktën 60 milionë dollarë shtesë.
Përveç kostove të ndërtimit dhe mbikëqyrjes, janë zhvilluar dy procedura për shërbime konsulence me vlerë 5.6 milionë euro, ndërkohë që ARRSH ka shfaqur mangësi të theksuara në projektim dhe menaxhimin e financimit, veçanërisht për lotin 3.
Kontrolli i Lartë i Shtetit paralajmëroi që në vitin 2019 për rreziqet dhe problemet e rënda të këtij projekti, por paralajmërimet u injoruan.
Më alarmante është se mbi këtë aks janë mbivendosur fonde publike përmes 6 kontratave të tjera prokuruar nga ARRSH me vlerë totale 2.4 milionë euro për punime dhe mirëmbajtje të kësaj rruge që prej vitit 2018 e në vijim.
Fituesi i fundit i shpallur më 20 nëntor, ishte kompania ‘2T shpk’, në pronësi të vëllait të kryebashkiakut të Tepelenës, ku si për lotin 1 dhe për lotin 3 me gjithë problemet e paraqitura në të shkuarën janë përzgjedhur të njëjtët fitues , tregues që ngre dyshime se garat nuk kanë qenë reale, por të paracaktuara, duke konsoliduar klientelizmin dhe korrupsionin.
Pas rrëshqitjes së skarpatave dhe dëmtimit të rëndë të rrugës vetëm dy muaj pas inaugurimit, mediat raportuan se kompania 2T ka nisur punimet për largimin e masivit shkëmbor ndërkohë që ende nuk ekzistonte një kontratë e lidhur dhe e njoftuar e tillë në sistemin elektronik të prokurimeve për këtë qëllim.
Edhe më shqetësues është fakti se rruga është hapur pa procedurë kolaudimi. Ligji është i qartë: asnjë vepër infrastrukturore nuk mund të hapet pa u certifikuar cilësia e punimeve. Hapja e këtij aksi pa kolaudim ka vënë drejtpërdrejt në rrezik jetën e qytetarëve.
Partia Demokratike kërkon që SPAK të nisë menjëherë hetimet për këtë aferë të rëndë korruptive, të identifikojë dhe ndëshkojë përgjegjësit, si dhe të garantojë llogaridhënie për miliona euro të shpërdoruara dhe për rrezikun e madh të shkaktuar ndaj qytetarëve.
Shqiptarët meritojnë transparencë, siguri dhe institucione që punojnë për ta, jo projekte të dështuara, kosto të fryra dhe korrupsion të pandëshkueshëm.
