Në fund të vitit 2025, numri i mjeteve rrugore të regjistruara (me status aktiv ose të çregjistruara përkohësisht) arriti n...
POLITIKE
"Për Ramën sot, 200 milionë euro janë thjesht bakshishe!" Blushi: Raportin konfidencial i OSBE-ODIHR-it 2015, tregon për përfitimit të një tarife në lejet e ndërtimit nga kryeministri
M.B.Përditësimi i fundit 28 Tetor 2024, 14:01
TIRANA- Sekretari i Përgjithshëm i Partisë së Lirisë, Tedi Blushi, ka marrë pjesë sot në një konferencë për shtyp ku përmendi një raport konfidencial të OSBE-ODIHR-it, të publikuar në vitin 2015, i cili ngrinte dyshime për korrupsion të përmasave të mëdha e që nuk është përgënjeshtruar sipas tij nga kryeministri Edi Rama.
Blushi tha se sipas OSBE-së, kryetari i PS-së, kryetari i bashkisë së Tiranës në vitet 2000-2011, dhe tani kryeministër, është përfolur shumë për dyshimet e përfitimit të një tarife në lejet e ndërtimit, që varionte nga 10 deri në 20% e vlerës së ndërtesave. Ai shtoi se për Ramën sot, 200 milionë euro janë thjesht bakshishe, të investuara në kompani offshore përmes vëllait të tij, Olsit, në Shtetet e Bashkuara të Amerikës.
"Askush në këtë vend nuk mund të harrojë kurrë se Edi Rama dhe Erion Veliaj kanë qenë gjithmonë në anën tjetër të barrikadës, të provuar me mijëra dokumente, fakte dhe prova si hajdutë ordinerë dhe të përbindshëm të fondeve publike, duke vazhduar edhe sot e kësaj dite të grabisin qindra miliona euro. Dhe, afërmendsh, Dumani as që guxon t’u përmendë emrin.
Po ju sjell në vëmendje një akuzë konkrete nga një institucion shumë serioz ndërkombëtar, bërë publike në media, raportin konfidencial të OSBE-ODIHR-it, të vitit 2015, i cili kurrë nuk është përgënjeshtruar nga Edi Rama. Por afërmendsh, për Altin Dumanin, ky është një “krim intelektual”. Ky raport nuk është dëshmi si ajo e Romeo Karajt apo të gjithë të ngjashmëve me mbiemrin e tij. Çfarë shkruan OSBE në këtë raport, për të cilin Edi Rama nuk është thirrur asnjë sekondë në SPAK?
Sipas OSBE-së, kryetari i PS-së, kryetari i bashkisë së Tiranës në vitet 2000-2011, dhe tani kryeministër, është përfolur shumë për dyshimet e përfitimit të një tarife në lejet e ndërtimit, që varionte nga 10 deri në 20% e vlerës së ndërtesave. I kujdesshëm për të operuar përmes personave të tretë, ai ka mohuar përfshirjen e tij në akuza, por pasuria e tij llogaritet në rreth 200 milionë euro – një vlerë e llogaritur 10 vite më parë, pasi për Edi Ramën sot, 200 milionë euro janë thjesht bakshishe – të investuara në kompani offshore përmes vëllait të tij, Olsit, në Shtetet e Bashkuara të Amerikës. E theksoj, këtë e shkruan OSBE, dhe jo Romeo Karaj me gjithë të ngjashmit me mbiemrin e tij", tha Blushi.
