Situata përpara Ministrisë së Arsimit ka përshkallëzuar sërish në përplasje të dhunshme fizike mes efektivëv...
POLITIKE
Përplasjet te Ministria e Arsimit, reagon PD: Koha e Ramës mbaroi, pushteti nuk e mbron më
PiranjatPërditësimi i fundit 13 Tetor 2026, 17:53
Partia Demokratike ka reaguar lidhur me protestën e sotme studentore dhe tensionet e krijuara para Ministrisë së Arsimit, ku pati përplasje mes protestuesve dhe forcave të rendit. Policia ndërhyri disa herë me autobote me ujë me presion dhe gaz lotsjellës për të shpërndarë të rinjtë.
Ish-deputeti Ervin Salianji dhe deputeti i PD-së, Klevis Balliu, kanë reaguar ashpër ndaj kryeministrit Edi Rama pas përplasjeve mes studentëve dhe policisë, duke e akuzuar për dhunën e ushtruar ndaj protestuesve dhe përdorimin e forcës për shpërndarjen e tyre. Salianji e ka cilësuar protestën si shprehje të zemërimit të akumuluar ndaj qeverisjes, duke deklaruar se të rinjtë kanë dalë në shesh për shkak të mungesës së perspektivës, padrejtësive dhe vështirësive për të ndërtuar të ardhmen në Shqipëri.
Sipas ish-deputetit demokrat, reagimi i policisë ndaj protestuesve tregon mënyrën se si qeveria po përballet me pakënaqësinë qytetare. Ai ka kërkuar dorëheqjen e Ramës, duke e akuzuar se ka zgjedhur forcën në vend të dëgjimit të kërkesave të të rinjve.
“Reagimi çnjerëzor i regjimit është dëshmi e agonisë politike të Ramës, e humbjes së çdo kufiri moral dhe e kalbëzimit të plotë të qeverisjes së tij”, shprehet Salianji.
Ai shton se kryeministri, në vend që të marrë përgjegjësi për gjendjen e vendit, po përpiqet t'i imponohet shoqërisë përmes dhunës dhe arrogancës.
“Në vend që të dëgjojë qytetarët dhe të marrë përgjegjësi për gjendjen ku e ka zhytur vendin duke dhënë dorëheqjen, ai zgjedh dhunën, arrogancën dhe prepotencën për t’iu imponuar një shoqërie që nuk pranon më të nënshtrohet”, deklaron ish-deputeti.
Akuza të forta ndaj kryeministrit ka drejtuar edhe deputeti demokrat Klevis Balliu, i cili ka dënuar ndërhyrjen e policisë ndaj studentëve.
“Ju që keni derdhur gjakun e të rinjve shqiptarë dhe të studentëve tanë, do ta paguani një më një këtë akt! Edi Rama, pushteti yt nuk të mbron dot! As këta banditë me uniformë nuk të shpëtojnë dot nga përgjegjësia për këtë dhunë dhe këtë gjakderdhje. Do të përgjigjesh përpara ligjit dhe përpara shtetit! Koha jote mbaroi!”, është shprehur Balliu.
Reagimet e përfaqësuesve të PD-së vijnë pas një proteste të shoqëruar me incidente, gjatë së cilës u dëmtuan xhamat dhe kangjellat e Ministrisë së Arsimit. Studentët nuk u tërhoqën, pavarësisht ndërhyrjeve të përsëritura të policisë me gaz lotsjellës dhe ujë me presion. Gjatë përplasjeve u shoqëruan mbi 10 persona, ndërsa u raportuan edhe disa të lënduar.
Studentët, të cilëve iu bashkuan edhe qytetarë, dolën në protestë për të kërkuar përmirësimin e kushteve në arsim dhe ndryshime në drejtimin e vendit.
