Anëtari i Kryesisë së Partisë Demokratike, Grigels Muçollari, deklaroi se helmimet e përsëritura të studentëve ...
POLITIKE
Rama dërgon hetimin tatimor pranë familjarëve për të goditur Spiropalin
PiranjatPërditësimi i fundit 26 Qershor 2026, 15:25
Për shkak të situatës së tensionuar politike së fundmi brenda PS-së, mesohet se ndaj subjekteve të lidhura me familjarë të ish-ministres Elisa Spiropali, janë shtuar kontrollet nga administrata tatimore dhe janë kryer verifikime të përsëritura në disa qytete.
Sipas të njëjtave burime, hetimi tatimor është shtrirë në biznese në Fier dhe Tiranë, ndërsa mësohet se janë ndërmarrë edhe kontrolle të reja, pavarësisht verifikimeve të mëparshme të kryera më herët gjatë këtij viti.
Gjithashtu, edhe policia ka ushtruar kontroll në një pronë të marrë me qira, ku është ndërtuar një kapanon bujqësor, duke ngritur dyshime për ndërtim pa leje. Pretendohet se objekti është ndërtuar me leje të rregullt ndërtimi, duke i konsideruar këto veprime si një seri kontrollesh të përsëritura ndaj aktivitetit të tyre ekonomik.
Këto kontrolle të shtuara tatimore te familjarët e Spiropalit, shtojnë dyshimet për presion politik ndaj kësaj të fundit lidhur me deklaratat dhe qëndrimet e mbajtura së fundmi ndaj Ramës.
Elisa Spiropali konsiderohej për vite me radhë si një nga bashkëpunëtoret më të afërta të kryeministrit dhe përmendej shpesh si një nga figurat që mund të luante një rol të rëndësishëm në drejtimin e Partisë Socialiste në të ardhmen.
Por pak muaj më parë, kryeministri e largoi atë nga funksionet drejtuese, një vendim që shkaktoi habi jo vetëm brenda radhëve të socialistëve, por edhe në opinionin publik.
Pas kësaj rënieje të beftë të ish-“beniamines” së Ramës, në qarqet politike po flitet edhe për një rol të mundshëm të ish-zëvendëskryeministres Belinda Balluku, e cila prej kohësh përflitet se ka pasur përplasje në distancë me Spiropalin./Piranjat News
