“Mos e prek Memaliajn!” Me këtë mesazh dhe pankarta në duar, banorë të Memaliajt dolën në aksin kryesor që l...
POLITIKE
Rama: Kemi drejtësi të pavarur, por ende s’kemi drejtësi të paanshme e as cilësore
PiranjatPërditësimi i fundit 11 Janar 2026, 10:10
Kryeministri Edi Rama ka zbardhur diskutimet me Ministrin e Drejtësisë së Francës. Në podkastin e tij “Flasim” Rama u shpreh se kanë biseduar për pjesëmarrjen e ekspertëve francezë në grupin e reflektimit mbi politikën penale në Shqipëri dhe mbi konsolidimin e draftit të ri të Kodit Penal.
Rama theksoi se Shqipëria ka nevojë për një reflektim serioz dhe të largpamës mbi politikën penale, që adreson problematikat e thella, por gjithashtu mbron pavarësinë e gjyqësorit, nxit paanësinë dhe rrit cilësinë e drejtësisë.
Sipas tij, kemi një drejtësi të pavarur, por nuk kemi ende as një drejtësi të paanshme e as një drejtësi cilësore.
“Gjatë qëndrimit tim në Paris, u takova edhe me Ministrin e Drejtësisë së Francës, me të cilin diskutuam mbi pjesëmarrjen e partnerëve francezë në grupin e reflektimit që kemi nisur për problematikat e politikës penale në Shqipëri, si dhe mbi konsolidimin e draftit të ri të Kodit Penal, në harmoni të plotë me standardet dhe praktikat më të mira evropiane.
Siç e kam thënë na duhet një reflektim i madh, serioz dhe largpamës mbi politikën penale në Shqipëri, sepse duhet të adresojmë problematika të mprehta, por njëkohësisht të mbrojmë pavarësinë, të nxisim paanësinë dhe të rrisim cilësinë e drejtësisë në këtë vend, ku kemi më në fund një drejtësi të pavarur, falë lidershipit të Partisë Socialiste të Shqipërisë dhe mbështetjes bipartizane të popullit shqiptar, po nuk kemi ende as një drejtësi të paanshme e as një drejtësi cilësore. Nuk është e lehtë, por unë nuk i jam përkushtuar politikës për të bërë gjëra të lehta apo për t’i marrë lehtë gjërat e rënda. Përkundrazi”, tha Rama.
