Dy të rinj humbën jetën tragjikisht dje pasi u mbytën në det te ‘Rana e Hedhun’ si pasojë e dallgëve ...
POLITIKE
Rama mbron projektin në Zvërnec mes protestave: Nuk po falim asgjë, është pronë private
PiranjatPërditësimi i fundit 29 Maj 2026, 17:05
Kryeministri Edi Rama reagoi sot ndaj polemikave që kanë shoqëruar projektin turistik në Zvërnec, duke mohuar pretendimet se shteti shqiptar po u fal investitorëve toka publike në një nga zonat më të debatueshme të bregdetit.
Gjatë prezantimit të kompanisë “Albanian Digital Solution”, Rama e cilësoi si “lajm të rremë” pretendimin se qeveria po dhuron pasuri publike, duke deklaruar se toka ku parashikohet zhvillimi është “pronë private denbabaden”.
Deklarata vjen ndërsa prej më shumë se dy javësh ambientalistë dhe aktivistë kanë organizuar protesta kundër projektit, duke paralajmëruar për pasoja të mundshme mbi ekosistemin e zonës së mbrojtur të Nartës dhe Zvërnecit. Kundërshtarët e projektit kanë kërkuar transparencë mbi përmasat reale të ndërhyrjes dhe ndikimin që mund të ketë në një nga habitatet më të rëndësishme natyrore të vendit.
Debati u zhvendos edhe në emisionin “Opinion”, ku Artemis Poshi, përgjegjëse e Sektorit Juridik në Agjencinë e Zhvillimit të Territorit, sqaroi se aktualisht nuk ekziston ende një projekt përfundimtar ndërtimi. Sipas saj, janë miratuar leje zhvillimi dhe një leje për infrastrukturën paraprake, por zhvillimi ndodhet ende në fazën e projekt-idesë.
Poshi deklaroi se sipërfaqja prej rreth 2.6 milionë metrash katrorë ku parashikohet zhvillimi është pronë private me certifikata pronësie dhe se, sipas verifikimeve të kryera nga institucionet, nuk përfshin pronë shtetërore. Ajo sqaroi gjithashtu se ende nuk është paraqitur një projekt përfundimtar dhe rrjedhimisht nuk ekziston asnjë leje mjedisore për zhvillimin.
Zyrtarja e AZHT-së theksoi se ligji aktual lejon dhënien e lejeve në zona të mbrojtura përmes procedurave dhe rregulloreve të posaçme, me kusht që të respektohen kriteret ekologjike dhe biodiversiteti. Sipas saj, po kryhen studime të detajuara me asistencën e studiove të huaja për të vlerësuar ndikimin e mundshëm të projektit dhe mënyrën e përshtatjes së tij me karakteristikat e zonës.
Nga ana e tij, Rama këmbënguli se shteti nuk po fal asgjë dhe se investitorët e përfshirë janë “tejet seriozë”, ndërsa sqaroi se përfshirja e drejtpërdrejtë e shtetit lidhet me ishullin e Sazanit, ku negociatat ende nuk kanë përfunduar.
