Deputeti i Partisë Demokratike Saimir Korreshi komentoi deklaratën e kryeministrit Edi Rama se prindërit e studentëve duhet të paguajn&...
POLITIKE
“Reforma territoriale duhet të jetë produkt konsensual”, Boçi nga Lezha: PD kërkon më shumë bashki, jo centralizim
PiranjatPërditësimi i fundit 22 Prill 2026, 19:47
Teksa vijojnë diskutimet në dëgjesën publike të Komisionit të Reformës Territoriale në Lezhë, bashkëkryetari i komisionit, Luciano Boçi, reagoi sërish duke theksuar se reforma e re duhet të jetë një produkt konsensual dhe i ndërtuar mbi vullnetin e qytetarëve.
Duke iu referuar reformës së vitit 2015, Boçi sqaroi se Partia Demokratike nuk e kishte braktisur procesin, por se ai ishte vendosur politikisht nga mazhoranca. “Në 2015 nuk pati konsensus real. Reforma u imponua dhe rezultatet i kemi sot përpara: një model që nuk funksionon siç duhet,” u shpreh ai.
Sipas tij, ndryshe nga ajo periudhë, reforma aktuale duhet të ndërtohet nga poshtë-lart, duke dëgjuar qytetarët dhe duke reflektuar nevojat reale të komuniteteve. Ai paralajmëroi se çdo tentativë për të vijuar me të njëjtën logjikë do të prodhojë të njëjtin rezultat.
Boçi ngriti edhe çështjen e numrit të bashkive, duke kundërshtuar qasjen për reduktimin e tyre pa një marrëveshje të gjerë politike dhe shoqërore. “Nëse në fund PS bën atë që kërkon – uljen e bashkive pa konsensus – çfarë fitojmë? E pranuam një herë dhe çfarë solli? Dështim. Nëse ndjekim të njëjtën rrugë, do të kemi të njëjtin rezultat,” deklaroi ai.
Në këtë kontekst, ai theksoi se Partia Demokratike mbron një model me më shumë bashki dhe më shumë autonomi vendore, si një mënyrë për të përmirësuar shërbimet dhe për të ruajtur lidhjen me komunitetin. Sipas Boçit, vetëm një reformë e ndërtuar mbi konsensus dhe mbi interesin e qytetarëve mund të garantojë funksionimin real të pushtetit vendor dhe të shmangë përsëritjen e gabimeve të së kaluarës.
