Në fund të vitit 2025, numri i mjeteve rrugore të regjistruara (me status aktiv ose të çregjistruara përkohësisht) arriti n...
POLITIKE
Synon të rregullojë veprimtarinë e saj, Qeveria prezanton pr.Ligjin 'Për Lobimin'
PiranjatPërditësimi i fundit 25 Tetor 2025, 11:43
Qeveria shqiptare ka prezantuar për herë të parë një projektligj që synon të rregullojë veprimtarinë e lobimit, duke vendosur rregulla të qarta për ndërveprimin ndërmjet zyrtarëve publikë dhe subjekteve private. Kjo nismë është një hap i rëndësishëm për të garantuar transparencën dhe për të parandaluar mundësitë për korrupsion në proceset e vendimmarrjes publike.
Ky projektligj është një pjesë e detyrimeve që Shqipëria ka marrë në kuadër të negociatave për anëtarësim në Bashkimin Evropian dhe, përkatësisht, në lidhje me pozicionin e përbashkët negociues të BE-së për Shqipërinë në Grupin e Kapitullit "Themeloret".
Pikat kryesore të projektligjit "Për Lobimin"
Projektligji fokusohet në ndërveprimin mes palëve të interesuara si bizneset, organizatat e shoqërisë civile dhe grupet e ekspertëve me zyrtarët publikë, duke siguruar që proceset e politikëbërjes të jenë transparente dhe të gjurmueshme. Ai përcakton një kuadër të qartë rregullash për veprimtarinë e lobimit, duke përfshirë detyrimin për regjistrimin e çdo individi apo subjekti juridik që angazhohet në lobim, si dhe detyrimin për të raportuar burimet financiare dhe shpenzimet çdo gjashtë muaj.
-Raportimin e rregullt mbi aktivitetet e lobimit dhe deklarimin e konfliktit të interesit.
-Respektimin e Kodit të Sjelljes dhe parimeve etike profesionale gjatë ushtrimit të lobimit.
-Mekanizmat për deklarimin e kontakteve të lobimit, përfshirë raportimet nga zyrtarët publikë që zhvillojnë takime me lobistë.
-Kufizime për ish-zyrtarët e lartë publikë për ushtrimin e lobimit pas përfundimit të detyrës së tyre.
Lobimi si instrument kundër korrupsionit
Në thelb të kësaj nisme qëndron parimi i transparencës dhe parandalimit të korrupsionit. Me krijimin e një regjistri publik të lobimit, çdo kontakt, kontratë apo shpenzim lobimi do të jetë i deklaruar dhe i verifikueshëm, duke mundësuar gjurmimin e burimeve të ndikimit dhe të interesave të përfaqësuara.
Përfitimet e projektligjit
Kjo nismë do të kontribuojë në krijimin e një mjedisi më të hapur dhe më të besueshëm për funksionet publike, duke rritur standardet e integritetit institucional. Për më tepër, ky proces reformues është një hap i rëndësishëm në forcimin e procesit të integrimit evropian të Shqipërisë dhe do të kontribuojë në konsolidimin e mirëqeverisjes.
Miratimi i këtij projektligji do ta pozicionojë Shqipërinë në një linjë të qartë me standardet ndërkombëtare të GRECO-s dhe OECD-së, duke i dhënë një shtysë të fortë përpara në drejtim të qeverisjes së hapur, transparencës dhe integritetit publik.
