Personi në foto, efektivi i ‘Shqiponjave’ Edison Adri, i cili mbeti i plagosur gjatë operacionit policor të zhvilluar në zon&e...
POLITIKE
"Të mbyllet, po shpenzon para nga taksat e shqiptarëve"/ Sindikata e RTSH: Agron Shehaj e shkeli vijën e kuqe me median
r.llPërditësimi i fundit 10 Prill 2025, 10:36
shehaj, rtsh
TIRANË- Kreu i Partisë Mundësia, Agron Shehaj është shprehur në rrjetet e tij sociale se Radio Televizioni Shqiptar duhet të mbyllet pasi sipas tij nuk ndiqet. Shehaj shprehet se paratë për financimin e televizionit publik janë para të shpenzuara kot, ndërsa shton se me mbylljen e RTSH-së, do të kurseheshin 30 milionë euro në vit.
“Një televizion publik që nuk e shikon askush, nuk e ndjek askush, dhe nuk ka asnjë ndikim real,shpenzon 30 milionë euro në vit nga taksat tuaja. Vetëm një shembull nga shumë të tjerë. Kështu i kursej unë Shqipërisë 1 miliard euro në vit, duke ndalur abuzimin, jo shërbimin; duke larguar parazitët, jo mësuesit e mjekët”, thotë Shehaj.
Lidhur me deklaratën e tij, ka reaguar edhe Sindikata e RTSH-së, ku shprehen se Shehaj e ka shkelur vijën e kuqe me mediat. Sipas tyre, propozimi i tij për të larguar nga puna me qindra punonjës, është kalimi i vijës së kuqe dhe cënim i lirisë së medias në Shqipëri.
Sindikata kërkon reagimin e institucioneve ndërkombëtare, prezencës së OSBE në Tiranë, ambasadës amerikane, European Broadcasting Union - EBU dhe KQZ Shqipëri.
Po ashtu kërkojnë që Shehaj të tërhiqet nga ato që Sindikata i cilëson "deklarata kërcënuese për 1046 punonjës të RTSh në të gjithë Shqipërinë, që nga punonjësi i mirëmbajtjes së antenave e deri te trupa e gazetarëve."
REAGIMI I PLOTË I SINDIKATËS:
Agron Shehaj E SHKELI VIJËN E KUQE ME MEDIAN
SINDIKATA E RADIO TELEVIZIOINIT SHQIPTAR shpreh indinjatën për përdorimin politik e elektoral, të medias Publike, nga një prej kandidatëve në zgjedhjet Parlamentare.
Propozimi i tij për të larguar nga puna me qindra punonjës, secili i vlerësuar në profesionin e vet, është kalimi i vijës së kuqe dhe cënim i Lirisë së Medias në Shqipëri.
Z. Agron Shehaj nuk mund ta çojë as në mend që të krahasojë median publike me atë private. Misioni i tyre është komerçial, ndërsa i RTSH Radio Televizioni Shqiptar udhëhiqet nga përfaqësimi i të gjitha kategorive sociale në vend.
Deklaratat e z. Agron Shehaj për nivelin e profesionalizmit të RTSh nuk mund të bëhen nga kafeneja apo zyra elektorale e partive.
Qëllimi i tij, dukshëm populizëm për të mbledhur vota nuk i shërben lirisë së medias.
Sindikata Rtsh kërkon reagimin e institucioneve ndërkombëtare dhe drejtpërdrejt OSCE Presence in Albania si organizmi që ka investuar në trajnimin e punonjësve të Radio Televizionit Shqiptar, U.S. Embassy Tirana , European Broadcasting Union - EBU dhe KQZ Shqiperi .
Kërkojmë tërheqjen e kandidatit z. Agron Shehaj nga deklaratat kërcënuese për 1046 punonjës të RTSh në të gjithë Shqipërinë, që nga punonjësi i mirëmbajtjes së antenave e deri te trupa e gazetarëve.
Kërkojmë nga z. Agron Shehaj ndjesë publike, në rast të kundërt dyshojmë për qëllime personale të tij duke sulmuar RTSH.
