Federata e Futbollit e Iranit ka paraqitur një ankesë zyrtare në FIFA, duke ngritur shqetësime serioze mbi kufizimet e udhëtimit q&eu...
POLITIKE
Tragjedia në plazhin e Tales, Gjin Gjoni: Katër viktima në pak javë, siguria në bregdet ka dështuar
PiranjatPërditësimi i fundit 19 Qershor 2026, 17:40
Deputeti i Partisë Demokratike, Gjin Gjoni, ka reaguar pas tragjedisë së ndodhur në plazhin e Tales, ku dy vajza të mitura, 9 dhe 11 vjeç, humbën jetën pasi u mbytën në det.
Përmes një reagimi publik, Gjoni shprehu ngushëllimet për familjet e viktimave, ndërsa ngriti shqetësimin për mungesën e masave të sigurisë në vijën bregdetare të Lezhës.
Sipas tij, në pjesën më të madhe të plazheve mungojnë kullat e vrojtimit, ndërsa aty ku ato ekzistojnë, shpesh janë pa roje bregdetare.
“Katër viktima brenda pak javësh janë dëshmia më e dhimbshme e mungesës së sigurisë në plazhet e Lezhës. Kjo nuk është më një rast i izoluar, por një alarm serioz që kërkon reagim të menjëhershëm dhe marrje përgjegjësish”, deklaroi Gjoni.
Ai u bëri thirrje organeve ligjzbatuese dhe institucioneve përgjegjëse që të hetojnë si ngjarjen e ndodhur në Tales, ashtu edhe rastin tragjik të regjistruar në fillim të muajit në zonën e Ranës së Hedhun, duke kërkuar zbardhjen e plotë të përgjegjësive.
Postimi i plotë
Mesditën e kësaj të premteje, një tjetër ngjarje tragjike ndodhi më bregdetin e Lezhës, ku dy vajza të mitura, 9 dhe 11 vjeç, humbën jetën pasi u mbyten në det në plazhin e Tales.
Në këto momente të vështira, u shpreh ngushëllimet më të sinqerta familjeve të tyre, duke ndarë me ta dhimbjen e madhe për këtë humbje të rëndë.
Por fatkeqësisht, kjo ngjarje rikthen edhe një herë në vëmendje mungesën e sigurisë në plazhe. Përtej propagandes, në pjesën më të madhe të vijës bregdetare të Lezhë mungojnë kullat e vrojtimit, ndërsa aty ku ato janë vendosur, janë bosh dhe pa roje bregdetare.
Katër viktima brenda pak javësh janë dëshmia më e dhimbshme e mungesës së sigurisë në plazhet e Lezhës. Kjo nuk është më një rast i izoluar, por një alarm serioz që kërkon reagim të menjëhershëm dhe marrje përgjegjësish.
Ju kërkoj organeve ligjzbatuese dhe institucioneve përgjegjëse të hetojnë këtë ngjarje dhe atë ndodhur në fillim fillim të këtij muaji në zonen e Ranës së Hedhun, të zbardhin përgjegjësitë dhe të vënë përpara drejtësisë çdo person që ka neglizhuar detyrën.
Nuk mund të ketë turizëm pa siguri. Mbrojtja e jetës së qytetarëve dhe pushuesve duhet të jetë prioritet absolut.
