Federata e Futbollit e Iranit ka paraqitur një ankesë zyrtare në FIFA, duke ngritur shqetësime serioze mbi kufizimet e udhëtimit q&eu...
AKTUALITET
“Jep dorëheqjen”/ Qytetarët 20 ditë në shesh kundër Ramës, nis marshimi drejt Kryeministrisë
PiranjatPërditësimi i fundit 19 Qershor 2026, 19:22
Për të 20-ën ditë me radhë, qindra qytetarë shqiptarë kanë dalë në protestë kundër qeverisë, duke vijuar një mobilizim që ka shënuar një nga valët më të gjata të pakënaqësisë qytetare të viteve të fundit.
Protesta, e cila nisi fillimisht si kundërshtim ndaj projektit në Zvërnec, është shndërruar tashmë në një lëvizje më të gjerë kundër qeverisë së kryeministrit Edi Rama. Çdo ditë, qytetarë nga Tirana dhe zona të tjera të vendit janë bashkuar në tubime dhe marshime, duke artikuluar kërkesa që shkojnë përtej një çështjeje të vetme dhe prekin mënyrën e qeverisjes së vendit.
Edhe këtë mbrëmje protestuesit kanë dalë sërish në rrugë, duke marshuar drejt Kryeministrisë dhe duke përsëritur thirrjet që janë bërë simbol i kësaj lëvizjeje: “Rama ik”, “Jep dorëheqjen” dhe “Ju erdhi fundi”.
Atmosfera përgjatë marshimit është karakterizuar nga thirrje kundër qeverisë, pankarta proteste dhe mesazhe që kërkojnë ndryshim politik. Pjesëmarrësit shprehen se protesta nuk ka më vetëm karakter kundërshtues ndaj një projekti të caktuar, por përfaqëson revoltën e qytetarëve ndaj qeverisjes së vendit.
Sipas protestuesve, fakti që mobilizimi ka vijuar pa ndërprerje për 20 ditë rresht tregon se pakënaqësia nuk është e përkohshme, por pasqyron një reagim të gjerë qytetar. Ata theksojnë se do të vazhdojnë të protestojnë derisa kërkesat e tyre të marrin përgjigje.
Pas gati tre javësh protestash të pandërprera, kërkesa kryesore e protestuesve mbetet e njëjtë: largimi i kryeministrit Edi Rama dhe hapja e një kapitulli të ri politik në vend.
