Një aksident rrugor është regjistruar paraditen e kësaj të enjte (4 qershor 2026) në Tiranë, pranë Fabrikës s&eum...
POLITIKE
Trump pezulloi programet e ndihmës/ Delegacioni i BE në Tiranë: Unioni ka qenë në pararojë të mbështetjes për reformën në drejtësi, do të vazhdojë kështu dhe më tej
r.llPërditësimi i fundit 6 Shkurt 2025, 19:29
foto ilustruese
TIRANË- Delegacioni i Bashkimit Europian në Tiranë ka reaguar pasi presidenti amerikan Donald Trump ndërpreu programet e ndihmës së SHBA-së për disa vende në botë, mes tyre dhe për Shqipërinë. Në reagimin e delegacionit të BE-së thuhet se Bashkimi Europian ka qenë në pararojë të dhënies së ndihmës për reformën në drejtësi dhe është e vendosur të vazhdojë ta mbështesë reformën në drejtësi në Shqipëri.
Po ashtu thuhet se që kur u miratua reforma në sistemin e drejtësisë në vitin 2016, BE-ja e ka intensifikuar këtë mbështetje. Sipas tyre aty përfshihej mbështetje buxhetore dhe mbi 50 milionë euro asistencë teknike, duke synuar veçanërisht ndërtimin e institucioneve. Delegacioni i BE thotë se burime të tjera parashikohen për ta vazhduar këtë mbështetje, edhe përmes Mekanizmit të Rritjes dhe Reformës për Ballkanin Perëndimor.
Më tej në reagim thuhet se BE e ka mbështetur SPAK-un që nga themelimi i tij nëpërmjet asistencës teknike të dedikuar në kuadër të projekteve EU4LEA dhe EU4 FOCAL me buxhet të përgjithshëm mbi 8 milionë euro.
REAGIMI I PLOTË I DELEGACIONIT TË BASHKIMIT EUROPIAN NË TIRANË:
• Kemi marrë dijeni për njoftimin e bërë nga Presidenti Trump për të pezulluar përkohësisht të gjitha programet e ndihmës së huaj të SHBA-së për 90 ditë në pritje të rishikimeve nga administrata e re.
* BE-ja ka qenë në pararojë të dhënies së ndihmës për reformën në drejtësi dhe është e vendosur të vazhdojë ta mbështesë reformën në drejtësi në Shqipëri.
* Që kur sistemi i drejtësisë iu nënshtrua një reforme thelbësore në vitin 2016, BE-ja e ka intensifikuar ndjeshëm këtë mbështetje. Kjo përfshinte mbështetje buxhetore dhe mbi 50 milionë euro asistencë teknike, duke synuar veçanërisht ndërtimin e institucioneve.
* Burime të tjera të rëndësishme parashikohen për ta vazhduar këtë mbështetje pa probleme, përfshirë përmes Mekanizmit të Rritjes dhe Reformës për Ballkanin Perëndimor.
* Roli i SPAK-ut dhe pavarësia e tij në hetimin, ndjekjen penale dhe gjykimin e çështjeve komplekse të korrupsionit është i një rëndësie kyçe. BE-ja e ka mbështetur SPAK-un që nga themelimi i tij nëpërmjet asistencës teknike të dedikuar në kuadër të projekteve EU4LEA dhe EU4 FOCAL me buxhet të përgjithshëm mbi 8 milionë euro.
* SPAK-u ka prodhuar rezultate të prekshme, duke kontribuar në përpjekjet e përgjithshme të Shqipërisë për të krijuar një historik të besueshëm në luftën kundër krimeve të rënda, krimit të organizuar dhe korrupsionit, përfshirë në nivel të lartë.
Shtetet e Bashkuara me urdhër të Presidentit Donald Trump kanë ndërprerë ndihmat e çdo lloj natyre për vendet e juaja. Ndër vendet që janë prekur nga ky urdhër i adminisratës Trump është dhe Shqipëria, ku janë ndërprerë fondet për më shumë se 30 institucione dhe për shuma organizata të tjera.
SHBA deri më tani ka qenë një nga mbështetëset kryesore të sistemit të drejtësisë në Shqiqëri dhe për reformën në drejtësi. Por me urdhërin e Trump, kjo mbështetje tashmë është shuar, deri në një njoftim të dytë pasi administrata e re të ketë vlerësuar efikasitetin dhe “përputhshmërinë me politikën e jashtme të Shteteve të Bashkuara”.
Por cilat kanë qenë mbështetjet e SHBA-së për Shqipërinë?
Dosja.al, ka bërë një kërkim në faqen zyrtare të SHBA-së për ndihmat e vendeve të huaja dhe ka nxjerr disa të dhëna në lidhje me këto ndihma. Në vitin 2024, SHBA-ja ka dhënë për Shqipërinë 18 mln dollarë nga të cilat sistemi i drejtësisë ka marrë 66,574 dollarë. Ndërkohë që reforma anti-korrupsion ka marrë 33,463 dollarë ndihma.
Ndërkohë që në vitin 2022, SHBA-ja i ka dhënë Shqipërisë 52 milion dollarë ndihma, nga të cilat gati 2 milion dollarë janë shpenzuar në forcimin e ligjit dhe anti-korrupsionin. Ndërsa 22 mijë dollarë janë shpenzuar për regjistrimin e magjistratëve në vend.
Në vitin 2021, SHBA-ja ka dhënë për Shqipërinë në total 14 milion dollarë ndihma dhe grante. Ku nga këto 1,825,000 dollarë janë shpërndarë për forcimin e ligjit dhe anti-korrupsionin.
Po ashtu dhe në vitin 2020 janë dhënë nga SHBA-ja 54 milion dollarë ndihma dhe grante, nga të cilat 4,131,209 dollarë janë dhënë për forcimin e ligjit dhe kontrollin e narkotikeve. Ndërsa 1,700,000 dollarë janë dhënë për sistemin e drejtësisë në vend.
