"Vazhdojmë me dyer të mbyllura!" Nuk e dinte që ishte në transmetim, drejtoresha e AKSHI-t jep detaje nga sulmet kibernetike iraniane: Institucioni ynë i pari që u sulmua nga 4 ekipe

TIRANA- Ka nisur rreth orës 09:00 mbledhja e Komisionit të Posaçëm “Për të koordinuar dhe mbikëqyrur të gjitha veprimet institucionale për të luftuar dezinformimin dhe format e tjera të ndërhyrjes së huaj në proceset demokratike të vendit”. E pranishme në këtë mbledhje është drejtoresha e AKSHI Mirlinda Karçanaj.

Kjo e fundit ka dhënë detaje në lidhje me sulmin e ndodhur nga skuadrat e Iranit, të mbështetur edhe nga shteti iranian pa qenë e informuar se mbledhja zhvillohej me praninë e kamerave dhe në transmetim direkt. Pasi mësoi këtë fakt, Karçanaj kërkoi që transmetimi të ndërpritej dhe punimet të vijonin pa praninë e kamerave.

Ajo tha se në ndihmë të shtetit shqiptar ka ardhur një nga ekipet më të mira të Microfort dhe një ekip elitë e sektorit cyber në FBI. Po ashtu Karçanaj tha se arsyeja pse u vendos ulja e të gjitha sistemeve të shtetit ishte sepse ende nuk diheshin pasojat e sulmit dhe nuk dihej nëse ai do të pasohej nga një tjetër edhe më i fortë.

“Institucioni ynë ishte i pari që u sulmua nga katër ekipe të mirënjohura. Kuptohet ne nuk e kishim idenë fare nën çfarë sulmi ishim ditët e para. Konkretisht në datën 15 strukturat tona të sigurisë arritën të kapnin tentativat e para. Masat u morën aq sa ishte e mundur po ndërkohë sulmi i datës 16 na tregoi vërtetë forcën e kundërshtarit që kishim përballë, synimi i skuadrave ishte të infektonin beckendet. Mbi 10 mijë në atë kohë", tha ajo.

akshi