Kreu i Partisë Demokratike, Sali Berisha, denoncoi atë që e cilësoi si pabarazi në kohën televizive të kushtuar mazhoranc&e...
POLITIKE
Vdekja e turistes gjermane në Himarë, Berisha publikon denoncimin: Helikopteri që do e çonte në Tiranë s'kishte ku ulej, qendroi një orë në ajër
PiranjatPërditësimi i fundit 10 Gusht 2026, 13:14
Një turiste gjermane 33-vjeçare ka humbur jetën më 30 korrik në Himarë, ndërsa kryetari i Partisë Demokratike, Sali Berisha, ka denoncuar publikisht mënyrën se si është menaxhuar rasti.
Përmes një postimi në Facebook, Berisha ka publikuar një denoncim të një qytetari, i cili ngre pikëpyetje mbi vonesat në transportin e pacientes drejt Tiranës, mungesën e një piste për uljen e helikopterëve të emergjencës dhe gjendjen e shërbimeve shëndetësore në Himarë.
Ai akuzon gjithashtu Policinë se ka dhënë një version të rremë për ngjarjen.
Më poshtë postimi i plotë i Sali Berishës:
Në Himarë vdes turistja 33 vjeçare.
Ndihma vonoi orë të tëra!
I fejuari thotë se ajo gëzonte shëndet të plotë. Policia mashtron thotë se asaj iu dha ndihma në kohë dhe se vdiq nga shkaqe natyrore?!?
Dënoj me forcë gjendjen e shpartalluar të Urgjencës në Shqipëri!
Pershendetje dr Një ngjarje tragjike ngre pikëpyetje serioze për shëndetësinë dhe infrastrukturën e emergjencave në Himarë.
Më 30 korrik, një shtetase gjermane, 33 vjeçe, e cila ndodhej për pushime në Himarë së bashku me të fejuarin e saj, u ndje keq në hotelin ku ishte akomoduar dhe kërkoi ndihmë mjekësore.
Ambulanca e Himarës reagoi menjëherë, por gjendja e saj kërkonte ndërhyrje të specializuar urgjente. Për shkak të mungesës së një spitali të mirëfilltë në Himarë, u vendos transportimi me helikopter drejt Tiranës.
Helikopteri mbërriti në Himarë, por hasi vështirësi për t'u ulur. Aktualisht, qyteti nuk disponon një pistë të dedikuar për uljen e helikopterëve dhe stadiumi, i cili është përdorur më parë për raste të tilla, ndodhet në rikonstruksion.
Sipas informacioneve, për më shumë se një orë u bënë përpjekje për të gjetur një vend të përshtatshëm uljeje, por pa sukses. (E reja priste, në gjendje të rëndë).
Më pas u vendos që helikopteri të ulej në Palasë, ndërsa 33-vjeçarja të transportohej me autoambulancë deri atje.
Fatkeqësisht, e reja ndërroi jetë gjatë transportit. Trupi i saj u dërgua në Tiranë, ku pritet të kryhen ekspertizat mjeko-ligjore për të përcaktuar shkakun e vdekjes. Sipas deklarimeve paraprake të të fejuarit, ajo nuk vuante nga probleme të njohura të zemrës.
Nëse vonesat në transport kanë ndikuar apo jo në këtë fund tragjik, është një çështje që mund të përcaktohet vetëm nga hetimet dhe ekspertiza mjekësore. Megjithatë, ngjarja ngre disa pyetje të rëndësishme:
Si është e mundur që Himara, një nga destinacionet turistike më të frekuentuara në Shqipëri, nuk ka një spital të pajisur për të përballuar urgjencat e rënda?
Pse nuk ekziston një pistë e dedikuar për uljen e helikopterëve të emergjencës, kur dihet se gjatë sezonit veror numri i turistëve shumëfishohet?
Në momentin që stadiumi u kthye në kantier ndërtimi, a ishte parashikuar një zgjidhje alternative për uljen e helikopterëve në raste urgjente?
A janë bërë analiza të riskut për sezonin turistik dhe a ka një plan funksional për evakuimin ajror të pacientëve?
A kanë qytetarët dhe turistët të njëjtën mundësi për të marrë ndihmë të shpejtë mjekësore, apo mungesa e infrastrukturës i vendos ata në rrezik?
A do të shërbejë kjo tragjedi si një kambanë alarmi për të investuar në shëndetësi dhe infrastrukturën e emergjencave në Himarë, apo gjithçka do të harrohet pas pak ditësh?
Ps: Sapo reagoi policia, dhe pafytyrësisht gënjen! Thotë se ndihma u dha dhe ajo vdiq për shkaqe natyrore...Jeni për të ardhur keq!
