Në fund të vitit 2025, numri i mjeteve rrugore të regjistruara (me status aktiv ose të çregjistruara përkohësisht) arriti n...
POLITIKE
Vendimi i Kushtetueses për Butrintin, Zhupa: Do të dorëzojmë padi në SPAK, të gjykohet veprimtaria e organeve shtetërore për këtë marrëveshje
M.B.Përditësimi i fundit 31 Maj 2024, 12:18
Ina Zhupa
TIRANA- Deputetja e Partisë Demokratike, Ina Zhupa, ka reaguar një ditë pas zbardhjes së vendimit të Gjykatës Kushtetuese për Parkun e Butrintit. Në një deklaratë për mediat nga Kryesia e Kuvendit, Zhupa tha se do t’i drejtohen me padi SPAK-ut për të gjykuar veprimtarinë e organeve shtetërore për këtë marrëveshje.
Deputetja shtoi se në nëntor 2023 në seancë plenare ka kërkuar përjashtimin e tre gjyqtarëve që janë Holta Xhacaj, Gent Ibrahimi dhe gjyqtarin Sandër Beci pasi kishin indicie për konflikt interesi. Ajo tha se gjyqtari Gent Ibrahimi është i faktuar se ka pasur lidhje me dy krerët e ADF-s duke tejkaluar dhe kompetencat e tij si kreu i KLP në atë kohë.
"Kam dy vite që përpiqem të informoj opinionin publik nëpërmjet medieve që kanë një sensitivitet kur vjen puna te identiteti dhe trashëgimia. Dje është zbardhur vendimi i Gjykatës Kushtetuese mbi Butrintitn që rezulton të jetë kundër Kushtetutës dhe Shqipërisë dhe mbrojtjes së Trashëgimisë Kulturore. Ky vendim ëhstë marrë në një shumicë të brishtë 5 me 4.
Dua të theksoj dy elemente të rëndësishme që kanë dalë sot që janë se në nëntor 2023 në seancë plenare kam kërkuar përjashtimin e tre gjyqtarëve që janë Holta Xhacaj, Gent Ibrahimi dhe gjyqtarin Sandër Beci dhe kishim indicie për konflikt interesi.
Gent Ibrahimi është i faktuar se ka pasur lidhje me dy krerët e ADF-s duke tejkaluar dhe kompetencat e tij si kreu i KLP në atë kohë. Kjo miqësi u shtri dhe në vendimmarrjen për një çështje ku ata ishin të përfshirë drejtpërdrejtë si anëtar të bordit në koncesionin e Butrintit...
Do t’i drejtohemi SPAK-ut me një padi, për të gjykuar veprimtarinë e organeve shtetërore për këtë marrëveshje, veprimtarinë e ADF-së dhe të tre gjyqtarëve që janë në konflikt interesi. A quhet korrupsion nëse paguan 250 mijë euro për të bërë një ligj që më pas t’i të marrësh një diçka për veten", tha Zhupa.
Kushtetuesja më 24 prill rrëzoi kërkesën e opozitës për shfuqizimin e ligjit mbi administrimin e "Butrintit", ku sipas vendimit do të jetë në menaxhimin e AADF-së. Kushtetuesja shprehej se për pretendimin e cenimit të parimit të ligjshmërisë, për shkak të dhënies së statutit partner strategjik të AADF-së me një akt nënligjor, nuk ka juridiksion ratione materiale për shkak të natyrës individuale të këtij akti.
Në vendimin e plotë të GJK thuhet ndër te tjera se: “Në lidhje me pretendimin për cenimin e identitetit kombëtar dhe të trashëgimisë kulturore, modeli i administrimit të nënzonës së trashëgimisë dhe peizazhit kulturor të Parkut të Butrintit nëpërmjet administrimit indirekt përmes krijimit të një fondacioni të dedikuar, erdhi si nevojë e gjetjes së vlerave të reja të administrimit në funksion të ruajtjes, mbrojtjes dhe rritjes së vlerave të trashëgimisë kulturore. Kjo, pasi sistemi aktual i menaxhimit nuk garantonte në perspektivë mbrojtjen dhe ruajtjen e vlerave kulturore e natyrore të sitit dhe zhvillimin e integruar të tij, si dhe nuk siguronte të ardhura sipas pritshmërive që duhet të ketë një pasuri me vlera kaq të rëndësishme kombëtare universale”.
Gjithashtu në vendimin e plotë, Gjykata argumenton mes të tjerash se marrëveshja nuk e zhvesh shtetin nga roli i tij në drejtim të identifikimit dhe mbrojtjes së vlerave të trashëgimisë kulturore.
