Në prag të miqësores Shqipëri – Izrael, e cila do të mbahet sonte në stadiumin “Air Albania” të Tiran&...
POLITIKE
Zvërneci/ Ermelinda Meksi: Qytetarët s’duhet të jenë vetëm spektatorë kur merren vendime që prekin mjedisin dhe pasuritë natyrore
PiranjatPërditësimi i fundit 3 Qershor 2026, 10:09
Ish-ministrja socialiste, njëherësh një ndër figurat historike të PS-së, Ermelinda Meksi ka komentuar debatin dhe protestat që kanë lindur pas kundërshtive të projektit të Zvërnecit.
Ermelinda Meksi i ka kujtuar qeverisë Rama se Shqipëria ka firmosur Konventën e Aarhusit në vitin 1998 dhe e ratifikoi këtë të fundit në 2000.
Sipas saj, “Konventa Aarhus mbështetet në tre parime themelore: Të drejtën e qytetarëve për informacion; Të drejtën për të marrë pjesë në vendimmarrje; Të drejtën për t’iu drejtuar institucioneve dhe drejtësisë kur këto të drejta cenohen”.
Në mesazhin e saj, ish deputetja e PS thekson se sipas kësaj konvente qytetarët nuk duhet të jenë spektatorë kur merren vendimet që prekin mjedisin dhe pasuritë natyrore të vendit.
“Shqetësimet dhe pyetjet e ngritura nga qytetarët duhen parë si pjesë e një procesi normal demokratik që ndihmon në forcimin e besimit publik dhe në parandalimin e konflikteve sociale. Në një vend që synon anëtarësimin në Bashkimin Europian, konsultimi publik dhe transparenca nuk janë thjesht zgjedhje politike, por standarde që burojnë nga angazhimet ndërkombëtare që vetë Shqipëria ka marrë përsipër.
Konventa e Aarhusit na kujton se qytetarët nuk janë spektatorë kur merren vendime që prekin mjedisin dhe pasuritë natyrore të vendit. Ata kanë të drejtë të informohen, të dëgjohen dhe të marrin pjesë në proces. Ky nuk është vetëm një standard europian i mjedisit. Është një standard europian i demokracisë, sigurisë dhe zhvillimit të qëndrueshëm”, thekson Meksi.
POSTIMI I PLOTË I ERMELINDA MEKSIT
Zvërneci, Rrjolli dhe Konventa Aarhus
Mes debatit për Zvërnecin dhe Rrjollin, vlen të kujtojmë një angazhim që Shqipëria e ka marrë prej më shumë se dy dekadash.
Shqipëria nënshkroi Konventën e Aarhusit në vitin 1998 dhe e ratifikoi atë në vitin 2000, duke u bërë ndër vendet e para që përqafoi këtë standard europian.
E miratuar më 25 qershor 1998 në qytetin danez Aarhus, kjo konventë konsiderohet një instrument unik, sepse lidh të drejtat mjedisore me transparencën, llogaridhënien e qeverive dhe zhvillimin e qëndrueshëm.
Konventa Aarhus mbështetet në tre parime themelore:
të drejtën e qytetarëve për informacion;
të drejtën për të marrë pjesë në vendimmarrje;
të drejtën për t’iu drejtuar institucioneve dhe drejtësisë kur këto të drejta cenohen.
Por Aarhusi nuk lidhet vetëm me mjedisin. Në filozofinë e tij dhe në frymën e institucioneve europiane, përfshirë dimensionin ekonomiko-mjedisor të sigurisë në kuadër të OSBE-së, transparenca, pjesëmarrja publike dhe qeverisja e mirë konsiderohen elementë të rëndësishëm të sigurisë, stabilitetit social dhe zhvillimit të qëndrueshëm.
Për këtë arsye, shqetësimet dhe pyetjet e ngritura nga qytetarët duhen parë si pjesë e një procesi normal demokratik që ndihmon në forcimin e besimit publik dhe në parandalimin e konflikteve sociale.
Në një vend që synon anëtarësimin në Bashkimin Europian, konsultimi publik dhe transparenca nuk janë thjesht zgjedhje politike, por standarde që burojnë nga angazhimet ndërkombëtare që vetë Shqipëria ka marrë përsipër.
Konventa e Aarhusit na kujton se qytetarët nuk janë spektatorë kur merren vendime që prekin mjedisin dhe pasuritë natyrore të vendit. Ata kanë të drejtë të informohen, të dëgjohen dhe të marrin pjesë në proces.
Ky nuk është vetëm një standard europian i mjedisit. Është një standard europian i demokracisë, sigurisë dhe zhvillimit të qëndrueshëm.
