Dashi
Diskutoni hapur me partnerin tuaj sot për te gjitha problemet qe keni pasur ne çift. Me qetësi dhe maturi do të zgjidhni gj...
SHOWBIZ
“Jam në ankth, kërkoj falje” – reagimi i Gjestit pas vendimit për paraburgim
PiranjatPërditësimi i fundit 13 Mars 2026, 18:34
Këngëtari i njohur Besart Kelmendi, i njohur për publikun si Gjesti, është lënë në paraburgim për një muaj nga Gjykata Themelore në Prishtinë. Vendimi vjen pas një incidenti të ndodhur pak ditë më parë në zyrat e kompanisë “Onima”, ku artisti dyshohet për kanosje, dëmtim të pasurisë dhe mbajtje pa leje të armës.
Gjatë seancës dëgjimore, Kelmendi ka shprehur pendesë, duke pranuar se veprimet e tij kanë qenë në gjendje afekti. “Jam në ankth, kam vepruar në gjendje të afektit. I kërkoj falje gjykatës, prokurorit si dhe palës së dëmtuar”, ka deklaruar ai.
Mbrojtja e tij, e përfaqësuar nga avokati Artan Qerkini, ka kundërshtuar kërkesën e Prokurorisë për paraburgim, duke argumentuar se reagimi ishte impulsiv dhe i ndikuar nga situata financiare e vështirë e artistit. Avokati ka shtuar se Gjesti nuk ka pasur aktivitete muzikore kohët e fundit dhe është i gatshëm të hyjë në marrëveshje për pranimin e fajësisë.
Sipas raportimeve nga “Betimi për Drejtësi”, incidenti ka ndodhur pas një mosmarrëveshjeje për një borxh të pashlyer. Dëshmitarët kanë rrëfyer se artisti ka hyrë në zyrat e kompanisë, ka dëmtuar kompjuterë e xhama dhe ka nxjerrë armë duke kërcënuar stafin.
Gjykata ka vlerësuar kërkesën e Prokurorisë si të bazuar, duke marrë parasysh rrezikun e ikjes, ndikimin në dëshmitarë dhe mundësinë e përsëritjes së veprës penale. Masa e paraburgimit do të zgjasë nga 11 marsi deri më 9 prill 2026.
