Kryeministri Edi Rama ka pranuar se mes protestuesve të muajve të fundit kanë pasur edhe anëtarë, mbështetës dhe votues t&e...
SHOWBIZ
Za Fest ka ngritur siparin! Tre ditë muzikë, poezi dhe art në zemër të Shkodrës
PiranjatPërditësimi i fundit 24 Korrik 2026, 12:14
Ka nisur në Shkodër edicioni i dhjetë i Za Fest, festivali muzikor nën drejtimin e ideatorit të tij, kantautorit Vlashent Sata.
I themeluar në vitin 2017 me synimin për të promovuar kulturën shqiptare përmes muzikës, artit dhe letërsisë, Za Fest nisi rrugëtimin e tij në Theth, duke e shndërruar peizazhin alpin në një skenë natyrore ku ndërthureshin muzika, legjendat dhe tradita shqiptare.
Me kalimin e viteve, festivali është zgjeruar edhe në zona të tjera të Shkodrës, duke sjellë atmosferën e tij në vende me vlera historike e kulturore, si Kalaja e Rozafës dhe Muzeu Historik i Shkodrës.
Edicioni jubilar i Za Fest zhvillohet më 23, 24 dhe 25 korrik, në ambientet e Muzeut Historik dhe në Kalanë e Shkodrës, duke sjellë një program të pasur me muzikë, art dhe performanca të ndryshme.
Ashtu si në edicionet e mëparshme, festivali tejkalon kufijtë me artistë nga trevat shqipfolëse dhe më gjerë. Në skenën e këtij edicioni do të ngjiten emra të njohur si NRG Band, Tayna, Shpat Deda, West Side Family, Vlashent Sata, si dhe artistë të tjerë të rëndësishëm.
Gjatë mbrëmjeve të festivalit, artdashësit do të kenë mundësinë të ndjekin performanca nga Rafel Hoxhaj, Rita Petro, Mimoza Ahmeti, Linda Rukaj, Denald Grepcka dhe shumë të tjerë.
Përgjatë viteve, Za Fest është kthyer në një pikëtakim të muzikës alternative, folklorit, poezisë, teatrit, baletit bashkëkohor dhe kinemasë, duke sjellë një ndërthurje unike mes artit dhe trashëgimisë kulturore shqiptare.
