Në prag të miqësores Shqipëri – Izrael, e cila do të mbahet sonte në stadiumin “Air Albania” të Tiran&...
SOCIALE
Fëmijët e 57-vjeçarit që shkaktoi tragjedinë në Durrës kërkojnë ndjesë publike: Na falni me gjithë shpirt
PiranjatPërditësimi i fundit 4 Maj 2026, 07:56
Pas aksidentit tragjik që tronditi Durrësin dhe mbarë opinionin publik, ku humbën jetën dy fëmijë dhe një tjetër mbeti i plagosur rëndë, kanë reaguar për herë të parë fëmijët e autorit të ngjarjes, 57-vjeçarit Nikoll Radaçi.
Vajza dhe djali i tij shprehin dhimbjen e thellë dhe kërkojnë falje publike ndaj familjeve të viktimave për tragjedinë e rëndë që ndodhi.
“Sot dalim përpara familjeve të viktimave me një dhimbje shumë të madhe dhe me një barrë të rëndë në zemër. Në emrin tonë dhe të familjes sonë, kërkojmë falje publike për tragjedinë që ka ndodhur,” – shprehen ata.
Ata theksojnë se janë të vetëdijshëm se asnjë fjalë nuk mund të lehtësojë dhimbjen e familjeve që humbën fëmijët e tyre, ndërsa e cilësojnë këtë ngjarje si një plagë që do të mbetet përjetë.
“E dimë që asnjë kërkim faljeje nuk mund të kthejë jetët e humbura. Megjithatë, ndjejmë detyrimin moral dhe njerëzor të përulemi me respekt të thellë dhe të shprehim keqardhjen tonë më të sinqertë,” – vijon mesazhi.
Në reagimin e tyre, ata nënvizojnë se nuk po kërkojnë justifikime dhe nuk po shmangin përgjegjësinë për atë që ka ndodhur, duke u shprehur të gatshëm të përballen me drejtësinë dhe të mbështesin familjet e prekura në çdo mënyrë të mundshme.
Një apel i veçantë u drejtohet drejtpërdrejt familjeve të viktimave:
“Ju kërkojmë falje me gjithë shpirt. Dhimbja juaj është e paimagjinueshme dhe e padrejtë.”
Kujtojmë se aksidenti tragjik ndodhi në lagjen nr. 15 në Durrës, ku 57-vjeçari, duke drejtuar një automjet tip “Benz ML” në gjendje të dehur, humbi kontrollin dhe përplasi tre fëmijë që po luanin në trotuar. Si pasojë, dy prej tyre humbën jetën, ndërsa një tjetër vijon të jetë në gjendje të rëndë në Spitalin e Traumës.
Ngjarja ka shkaktuar reagime të forta në publik dhe ka hapur debat të gjerë mbi sigurinë rrugore dhe përgjegjësinë individuale.
Në këtë kontekst, është e rëndësishme të theksohet se përgjegjësia për një akt të tillë është individuale. Familjarët e autorit, pavarësisht dhimbjes që po përjetojnë, nuk mbajnë përgjegjësi për veprimin e tij dhe nuk duhet të bëhen objekt gjykimi apo sulmesh, në një moment kaq të rëndë për të gjitha palët e përfshira.
