ZVICËR- Një shqiptar ka provuar ta hapë derën e avionit gjatë një fluturimi nga Zyrihu për në Prishtinë. Per...
SOCIALE
Inspektimet zbuluan 2600 punëmarrës informalë gjatë 2024-s, rritje me 32%
M.B.Përditësimi i fundit 10 Mars 2025, 15:21
TIRANA- Punëmarrësit informalë të konstatuar gjatë inspektimeve nga ana e institucioneve ishin 32% më shumë gjatë 2024-s në raport me të njëjtat shifra të raportuara në 2023. Inspektorati Shtetëror i Punës dhe Shërbimeve Shoqërore vlerëson se ka një numër në rritje edhe të konstatimeve ku punëmarrësit nuk kanë kontrata individuale me punonjësit.
“Informaliteti i shfaqur në të gjitha format e tij ka qenë në qendër të proceseve inspektuese me fokus të shtuar në sektorë të veçantë. Janë konstatuar 2600 punëmarrës informalë, 1,058 ose 32% më shumë se një vit më parë, për të cilët është formalizuar marrëdhënia e punësimit brenda procesit inspektues, përmes masave ligjore të marra nga inspektorët e punës.
Janë konstatuar të punojnë 3952 punëmarrës pa kontrata individuale ose 58% më shumë se viti 2023. Mungesa e kontratës së punës, si një nga elementet kryesore të informalitetit gri në një marrëdhënie punësimi ka qenë në qendër të orientimit të planifikimit me bazë risku gjeneruar nga sistemi digjital MIRA”, thuhet në raportin vjetor të vitit 2024 të institucionit.
I njëjti dokument përllogarit edhe ndikimet pozitive që kanë ardhur nga formalizimi në tregun e punës me një efekt 28,5 milionë lekë/muaj kontribut i shtuar në skemën e kontributeve të sigurimeve shoqërore dhe shëndetësore që krahasimisht me mesataren e tre viteve të fundit është 11.3 milionë lekë më shumë vetëm në 1 muaj. Nga ana tjetër për rastet e shkeljeve janë vendosur edhe penalitete.
“Në lidhje me sanksionet, për shkeljet flagrante, të rënda ose të përsëritura, janë vendosur 210 gjoba me vlerë 53,790,000 lekë, një rritje prej 42% në numër dhe 25% në vlerë krahasuar me vitin e kaluar. Vetëm 21% e gjobave u ankimuan, shifër kjo më e ulët krahasuar me vitet e mëparshme.
Gjykata ka lënë në fuqi 100% të vendimeve të inspektimit dhe 45% e gjobave janë likuiduar vullnetarisht, 10% më shumë se vitin e kaluar, duke reflektuar një përmirësim të ndjeshëm të cilësisë së vendimmarrjes së inspektorëve”, raporton Inspektorati. / Monitor
