Dashi
Përpiquni të shmangni polemikat dhe diskutimet. Edhe me fjalë nëse është e mundur thoni se jeni të disponueshëm p...
SOCIALE
Ligji i ri shqiptar për tatimet përfshin edhe kriptomonedhat. Kush fiton, paguan
PiranjatPërditësimi i fundit 9 Maj 2023, 15:00
Në ligjin e ri për tatimin mbi të ardhurat, përfshihen edhe kriptomonedhat. Përcaktuar si “të ardhura nga mjetet virtuale”, çdo person brenda Shqipërisë që merr para nga tregtimi i kriptove do të tatohet.
Vlera që do të tatohet është diferenca midis shumës që është blerë aseti virtual dhe shumës që ajo është shitur. Në ligjin e sapomiratuar nuk ka një normë tatimi, por thuhet se ministria e Financave do të nxjerrë më vonë një udhëzim për mënyrën e llogaritjes.
Ky është akti i dytë ligjor që përfshin kriptomonedhat pas atij në 2020-n, për licencimin e kriptovalutave dhe aktivitetit të prodhimit të tyre.
Por, megjithëse ligji ka hyrë në fuqi dhe bashkë me të edhe rregulloret përkatëse nga AMF, deri më tani nuk ka asnjë subjekt të licencuar për ushtrimin e këtij aktiviteti, që do të thotë se nëse ligji për tatimin e të ardhurave i propozuar në këtë formë do të hynte në fuqi, ai s’ka çfarë të tatojë, pasi s’ka subjekte.
Metodologjia është e ngjashme me atë për tatimin e të ardhurave nga bastet online, që kush fiton, paguan 15% të vlerës.
Më herët në një mbledhje të Komisionit të Ekonomisë, deputeti socialist, Erion Braçe ngriti shqetësimin se tregu i zi i kriptomonedhave po lulëzon me para kriminale.
“Nuk është marrë asnjë licencë, ndërkohë që tregu i zi në asetet virtuale po lulëzon. Në këtë fushë ka marrë përmasa, është bërë i madh dhe i prin paraja e krimit të organizuar, korrupsioni vjen më poshtë”, deklaroi Braçe.
Nëse nuk ndërhyhet, sipas Braçes, vendi rrezikon që të përsërisë një krizë të ngjashme financiare si ajo e piramidave në mes të viteve ’90.
“Në atë kohë një copë letër kishte nga Banka e Shqipërisë, që thoshte se tregu ishte i palicencuar, ndërkohë që bankat kishin hyrë me kohë në tregun e palicencuar të fajdeve në 1995-1996. Duhet të jemi shumë aktivë në pjesën e licencimit se prandaj është bërë ligji. Duhet të jeni agresiv në këtë pjesë për të ftuar ata që janë avantgardë në këtë aktivitet. Agresivë edhe në pjesën e denoncimit”, deklaroi Braçe.
