Revolta kundër ndërtimeve në Zvërnec nuk është kufizuar vetëm brenda Shqipërisë. Dje dhe sot, shqiptarë që...
SOCIALE
S'ka më vula në pasaportë, njihuni me rregullat e reja në aeroporte/ Si do funksionojë për shqiptarët
PiranjatPërditësimi i fundit 15 Tetor 2025, 16:02
Që nga 12 tetori, në aeroportet e zonës Shengen ka hyrë në fuqi sistemi i ri i identifikimit biometrik, i njohur si EES (Entry/Exit System), i cili aplikohet për qytetarët nga vendet e treta që nuk kanë nevojë për vizë për të hyrë në Bashkimin Evropian. Ky sistem nuk prek qytetarët e BE-së, por vetëm ata që udhëtojnë për qëndrime afatshkurtra deri në 90 ditë brenda 180 ditëve.
Edlira Margilaj, përfaqësuese e Autoritetit të Aviacionit Civil, në një emision televiziv bëri të ditur se zbatimi i sistemit EES ka filluar zyrtarisht, por do të shtrihet gradualisht në të gjitha aeroportet e zonës Shengen deri në mars 2026, gjatë një periudhe tranzitore testimesh dhe përmirësimesh.
“Sistemi po aplikohet gradualisht dhe do të ketë një periudhë tranzitore deri në fund të marsit 2026 për testime dhe përmirësime, në mënyrë që qytetarët të përshtaten me procedurat e reja,” tha Margilaj. Ajo shtoi se asistentë do të ndihmojnë udhëtarët, veçanërisht të moshuarit, në rast të vështirësive teknike.
Të dhënat biometrike dhe personale do të ruhen për tre vjet nga data e fundit të hyrje-daljes në zonën Shengen. Regjistrimi bëhet vetëm një herë, dhe hyrjet pasuese do të jenë më të shpejta.
Margilaj sqaroi se sistemi nuk funksionon në aeroportet e Shqipërisë, pasi vendi nuk është pjesë e zonës Shengen. “Një shqiptar që nis udhëtimin nga aeroporti i Rinasit do të kalojë procedurat e sistemit EES kur të mbërrijë në aeroportin e një vendi Shengen. Atje, ai do të kalojë në kontrollin kufitar me kabina biometrike ku do të vendosë pasaportën, do t’i bëhet foto e fytyrës, do të merren shenjat e gishtave për personat mbi 12 vjeç, dhe më pas sistemi do të përfundojë procesin brenda disa minutash,” tha ajo.
Ky sistem zëvendëson vulosjen manuale të pasaportave me një proces plotësisht digjital, duke synuar të shkurtrojë kohën e pritjes në kufij dhe të përmirësojë sigurinë e hyrje-daljeve në Bashkimin Evropian.
