“New York Times” i ka kushtuar një artikull protestës së të shtunës në Tiranë, ku studentët protestuan s&e...
SPORT
FSHF organizon ceremoni për Silvinjon, trajneri emocionohet: Secilin prej jush e kam në zemrën time
PiranjatPërditësimi i fundit 22 Maj 2026, 18:28
Federata Shqiptare e Futbollit organizoi një event mirënjohjeje për ish-trajnerin e Kombëtares shqiptare, Sylvinho, si edhe për ndihmësit e tij, Doriva dhe Pablo Zabaleta, për kontributin e tyre gjatë tre viteve e gjysmë në krye të kuqezinjve.
Në aktivitet morën pjesë presidenti i FSHF-së, Armand Duka, anëtarë të Komitetit Ekzekutiv, ish-futbollistë të Kombëtares, përfaqësues të medias dhe bashkëpunëtorë të Federatës.
Në fjalën e tij, Duka vlerësoi punën dhe profesionalizmin e stafit teknik, duke veçuar kualifikimin historik të Shqipërisë në UEFA Euro 2024. Si shenjë mirënjohjeje, trajnerëve iu dhuruan fanella të Kombëtares me mbishkrimin “Forever”.
Gjatë ceremonisë, Sylvinho mbajti një fjalim emocional, ku falënderoi të gjithë stafin e Federatës dhe kujtoi marrëdhëniet njerëzore të krijuara gjatë kohës së tij në Shqipëri.
“Kur dikush e merr përsipër një punë, e merr përsipër që ta bëjë në 100% të saj. Ka raste që puna shkon mirë, ka raste që nuk shkon mirë. Kështu është futbolli. Unë bëj një profesion shumë të vështirë, shumë prej jush këtu e dini. Tani flasim për 3 vite e gjysmë. Jam absolutisht i lumtur për atë që kemi bërë. Kemi thënë që nga dita e parë që ‘Ne jemi një’”, u shpreh trajneri brazilian.
Ai theksoi se mbi rezultatet sportive, ajo që do të mbetet më shumë në kujtesën e tij janë raportet njerëzore.
“Nuk do doja të flisja për Euro 2024, kualifikueset e Botërorit apo fazën play-off. Unë do doja të flisja për më shumë se 100 persona që jetojnë dhe punojnë për Federatën. Me shumë prej jush kam pasur mundësi të bëj një bisedë të bukur dhe të pi një kafe”, tha Sylvinho.
Trajneri kujtoi edhe ditët e para në ambientet e FSHF-së, ku sipas tij krijoi lidhje të veçanta me stafin.
“E kujtoj ende që 3 vite më parë, në katin e katërt ku është presidenti, aty ishte kafeja. Në orën 9 të mëngjesit shkoja aty dhe, ditë pas dite, kam pirë kafe me secilin prej jush dhe kam dëgjuar secilin prej jush që punoni në atë vend të bukur pune. Do të mbetet gjithmonë në zemrën time”, deklaroi ai.
Në fund të fjalës së tij, Sylvinho falënderoi të gjithë bashkëpunëtorët për mbështetjen dhe emocionet e përjetuara.
“Përtej çdo gjëje që kemi parë këtu, që është e bukur, të emocionon, por sidomos ju, raporti human, këtë nuk do ta harroj kurrë. Secilin prej jush e kam në zemrën time. Faleminderit shumë, mirupafshim!”, përfundoi ai.
