Sot në orën 10:00 Sekretariati i Etikës në Kuvend do të mblidhet online për të shqyrtuar kërkesën e një grup...
SPORT
Zbulohet renditja sekrete për Topin e Artë? 100 votues zgjedhin mes 30 yjeve të futbollit, ja kush shpallet fitues nga sondazhi i “The Athletic”
PiranjatPërditësimi i fundit 22 Tetor 2026, 18:31
Megjithatë, bëhet fjalë për një votim të zhvilluar nga media britanike, dhe jo për rezultatin zyrtar të çmimit prestigjioz, fituesi i të cilit pritet të shpallet në Londër të hënën, më 26 tetor.
Në sondazh morën pjesë 100 persona nga bota e futbollit, përfshirë lojtarë dhe trajnerë aktualë e të mëparshëm, drejtorë sportivë, skautë, presidentë klubesh dhe drejtues të tjerë nga vende të ndryshme të botës. Secili prej tyre duhej të rendiste dhjetë futbollistët e preferuar nga lista me 30 kandidatë për Topin e Artë.
Sulmuesi anglez i Bayern Munich kryesoi bindshëm klasifikimin, duke grumbulluar 1103 pikë. Në vendin e dytë u rendit talenti i Barcelonës, Lamine Yamal, me 991 pikë, ndërsa Kylian Mbappe zuri vendin e tretë me 728 pikë.
Kane shihet si një nga favoritët kryesorë për të fituar çmimin individual, pas një sezoni të jashtëzakonshëm 2025-2026. Sulmuesi anglez shënoi 73 gola për klubin dhe kombëtaren, ndërsa me Bayern Munich fitoi Bundesligën dhe arriti deri në gjysmëfinalet e Champions League.
Edhe me kombëtaren e Anglisë, Kane arriti në gjysmëfinalet e Kupës së Botës, duke shtuar argumentet në favor të tij në garën për çmimin më të rëndësishëm individual në futboll.
Dominimi i tij në sondazhin e “The Athletic” ishte i dukshëm edhe në mënyrën se si votuan pjesëmarrësit. Kane mori 39 vota për vendin e parë, më shumë se çdo kandidat tjetër, u përfshi në tri vendet e para nga 72 votues dhe mori të paktën një votë nga 96 prej 100 pjesëmarrësve.
Për sistemin e pikëzimit, vendi i parë vlerësohej me 15 pikë, i dyti me 12, i treti me 10 dhe më pas pikët shpërndaheshin në rend zbritës deri te vendi i dhjetë, që merrte një pikë.
Një lojtar aktual i Premier League, i cili mori pjesë në sondazh, vlerësoi sezonin e anglezit, duke theksuar numrin e jashtëzakonshëm të golave dhe paraqitjet në kompeticionet madhore.
“Numrat e Kane janë të çmendur. Ai ka arritur gjithashtu në gjysmëfinalet e Champions League dhe të Kupës së Botës. Është e vërtetë që nuk i fitoi këto kompeticione, por është e jashtëzakonshme sa shumë gola ka shënuar”, u shpreh lojtari.
Edhe një ish-trajner i Premier League e vlerësoi sulmuesin anglez si një futbollist të kompletuar, duke nënvizuar aftësinë e tij për të shënuar, për të mbajtur topin dhe për të ndihmuar shokët e skuadrës në ndërtimin e aksioneve.
Një tjetër ish-lojtar i kampionatit anglez e cilësoi Kane një golashënues të pastër, ndërsa një ish-trajner argumentoi se paraqitjet e tij nuk duhet të nënvlerësohen vetëm për faktin se luan në Bundesligë.
Yamal dhe Mbappe, rivalët kryesorë
Në vendin e dytë u rendit Lamine Yamal, i cili grumbulloi 991 pikë dhe mori 23 vota për vendin e parë. Talenti i Barcelonës u vlerësua nga pjesëmarrësit për aftësinë për të ndryshuar rrjedhën e një ndeshjeje dhe për ndikimin e tij në fushë, pavarësisht moshës së re.
Një ish-lojtar i Premier League e përshkroi Yamal si një talent që shfaqet vetëm një herë në një brez, ndërsa një tjetër pjesëmarrës, fitues i Champions League, vlerësoi atë që futbollisti spanjoll po arrin në këtë fazë të karrierës.
Kylian Mbappe u rendit i treti me 728 pikë. Sulmuesi francez mori shtatë vota për vendin e parë, ndërsa 54 nga 100 pjesëmarrësit e përfshinë në renditjen e tyre.
Një ish-futbollist që ka luajtur në Ligue 1 dhe Bundesligë vlerësoi arritjet e Mbappe, duke përmendur paraqitjet e tij në Champions League, La Liga dhe Kupën e Botës.
Pas tyre, në dhjetëshen e parë u renditën Michael Olise me 646 pikë, Lionel Messi me 498, Rodri me 481, Khvicha Kvaratskhelia me 401, Erling Haaland me 353, Ousmane Dembele me 320 dhe Jude Bellingham me 292 pikë.
Messi vijon të ketë mbështetësit e tij
Një prej detajeve më interesante të sondazhit ishte renditja e Lionel Messit në vendin e pestë, pavarësisht se argjentinasi mori nëntë vota për vendin e parë, më shumë se Mbappe.
Messi vazhdon të ketë mbështetës të shumtë, të cilët vlerësojnë ndikimin e tij në lojë dhe paraqitjet me kombëtaren e Argjentinës.
Një ish-lojtar i Premier League, që e renditi Messin në vendin e parë, u shpreh se argjentinasi ka qenë më i miri pa asnjë dyshim. Një drejtues aktual i futbollit anglez vlerësoi gjithashtu kontributin e tij me kombëtaren.
Një ish-futbollist i MLS-së dhe i kombëtares argumentoi se Messi vazhdon të jetë një prej lojtarëve më të mirë në botë, duke theksuar ndikimin që ka në çdo ndeshje dhe qëndrueshmërinë e nivelit të tij.
Në total, 11 futbollistë morën të paktën një votë për vendin e parë. Përveç Kane, Yamal, Mbappe dhe Messi, në këtë listë përfshihen Khvicha Kvaratskhelia, Michael Olise, Rodri, Fabian Ruiz, Erling Haaland, Ousmane Dembele dhe Jude Bellingham.
Pse gara për Topin e Artë është e hapur?
Sipas analizës së “The Athletic”, gara e këtij viti është veçanërisht e vështirë për t’u parashikuar, pasi kandidatët kanë pasur arritje të ndryshme në nivel individual dhe kolektiv.
Tradicionalisht, fituesi i Topit të Artë ka qenë shpesh një prej lojtarëve kryesorë të skuadrës që ka fituar Champions League ose një kompeticion madhor për kombëtaret, si Kupa e Botës apo Kampionati Evropian. Në raste të tjera, çmimi ka shkuar për Lionel Messin ose Cristiano Ronaldon.
Nëse Kane fiton këtë vit, ai do të bëhej një nga përjashtimet e rëndësishme nga ky model. Sipas “The Athletic”, që nga viti 2005, kur çmimin e fitoi Ronaldinho, nuk ka fituar një futbollist që nuk është Messi apo Ronaldo dhe që nuk ka arritur në finalen e Champions League apo të një kompeticioni madhor kontinental ose botëror, duke marrë parasysh kriteret e përmendura në analizë.
Një faktor tjetër mund të jetë shpërndarja e votave mes futbollistëve të skuadrave të suksesshme. Në listën e kandidatëve përfshihen gjashtë lojtarë të Spanjës dhe nëntë të Paris Saint-Germain, çka mund të ketë ndikuar në ndarjen e votave mes yjeve të këtyre ekipeve.
Sondazhi tregoi gjithashtu se trajnerët dhe drejtuesit teknikë kishin prirjen të zgjidhnin Kane ose Yamal si favoritët e tyre, ndërsa një pjesë e konsiderueshme e lojtarëve, drejtuesve dhe skautëve mbështetën emra të tjerë.
Kishte edhe zgjedhje të veçanta: një drejtues sportiv i Bundesligës e renditi Declan Rice në vendin e dytë, një ish-futbollist dhe trajner i kombëtares vendosi Marc Cucurella në vendin e tretë, ndërsa një ish-trajner i Premier League zgjodhi Marquinhos në vendin e tretë.
Megjithatë, në përfundim të sondazhit, Kane doli në krye me një diferencë të konsiderueshme nga rivalët e tij.
Përgjigjja përfundimtare do të jepet të hënën, më 26 tetor, kur do të shpallet fituesi i çmimit për vitin 2026.
