Në fund të vitit 2025, numri i mjeteve rrugore të regjistruara (me status aktiv ose të çregjistruara përkohësisht) arriti n...
SOCIALE
Shkodra sërish në zi: Sa jetë duhet të merren që shteti të zgjohet?
PiranjatPërditësimi i fundit 8 Shtator 2025, 12:12
Piranjat.al
Vetëm pak ditë pas një ngjarjeje kriminale që tronditi qytetin, Shkodra u gdhi sërish nën hijen e plumbave: dy viktima dhe dy të plagosur. Kronika e zezë nuk është më rastësi e izoluar, por një kapitull i përditshëm që po gërryen besimin e qytetarëve tek shteti, drejtësia dhe siguria publike.
Shkodra, që për dekada është krenuar si djepi i kulturës, i arsimit dhe i qytetarisë, sot përmendet më shpesh për atentate, grabitje dhe arrati spektakolare me armë në dorë. A është ky fati që meriton ky qytet? Apo kemi hyrë në një spirale ku krimi po sfidon hapur autoritetin e shtetit?
Në çdo rast, përgjegjësia nuk mund të fshihet. Institucionet ligjzbatuese, policia dhe prokuroria, nuk mund të mjaftohen me komunikata të thata dhe arrestime të vonuara. Çfarë vlere ka arrestimi i një autori, kur të nesërmen qyteti zgjohet me një tjetër bilanc tragjik? Krimi po lëviz më shpejt se drejtësia.
Shkodra nuk ka nevojë vetëm për uniforma policësh në rrugë, por për një plan të qartë, serioz dhe afatgjatë. Sepse pas çdo statistike, pas çdo shifre “dy të vrarë, dy të plagosur”, fshihen familje të shkatërruara, jetë të prera dhe një komunitet që jeton me frikën se kush do të jetë viktima e radhës.
Nëse kjo spirale nuk ndalet, Shkodra rrezikon të humbasë jo vetëm imazhin e saj, por edhe shpresën. Dhe një qytet pa shpresë është shumë më i rrezikshëm se një qytet pa siguri.
