Kryeministri Edi Rama ka kërcënuar kryetarët e bashkive, pasi siç tha ai ka marrë ankesa nga qytetarë se disa prej tyre lë...
AKTUALITET
Apeli i SHP: Kufizoni daljet në orët e pikut, konsumoni sa më shumë ujë
PiranjatPërditësimi i fundit 24 Qershor 2026, 13:03
Temperaturat e larta të verës paraqesin rrezik të shtuar për shëndetin, veçanërisht për të moshuarit, fëmijët, gratë shtatzëna dhe personat me sëmundje kronike.
Ministria e Shëndetësisë dhe Mirëqenies Sociale ndau sot mesazhin e mjekes së Institutit të Shëndetit Publik dr. Rudina Çumashi, e cila apelon për kujdes të shtuar gjatë ditëve me temperatura të larta, duke rekomanduar hidratim të vazhdueshëm, shmangie të ekspozimit në diell gjatë orëve të pikut dhe qëndrim në ambiente të freskëta.
Sipas saj, gjatë stinës së verës dhe valëve të të nxehtit, temperaturat e larta mund të shkaktojnë një sërë problemesh shëndetësore, duke rritur rrezikun e dehidrimit, goditjes nga i nxehti dhe komplikacionet tek personat me sëmundje kronike.
Dr. Çumashi thekson se të gjithë janë të ekspozuar ndaj rrezikut nga temperaturat e larta, por grupet më vulnerabël mbeten fëmijët, të moshuarit, të sëmurët kronikë, personat që jetojnë vetëm, gratë shtatzëna dhe individët që punojnë në ambiente të hapura.
“Rekomandojmë kufizimin e daljeve gjatë orëve të pikut, nga ora 11:00 deri në 18:00, qëndrimin në ambiente të freskëta dhe mbajtjen e trupit të hidratuar. Nëse është e domosdoshme të dalim jashtë, duhet të vishemi me rroba të lehta dhe me ngjyra të çelëta, të përdorim syze dielli, kapele dhe të kemi gjithmonë me vete një shishe ujë”, këshillon ajo.
Po ashtu, rekomandohet konsumimi i rregullt i ujit për të shmangur dehidratimin, ndërsa duhet të kufizohet përdorimi i kafesë, pijeve alkoolike dhe atyre të gazuara. Mjekja Çumashi sugjeron një ushqyerje të shëndetshme, të pasur me fruta dhe perime të freskëta.
Kujdes i veçantë duhet të tregohet për fëmijët e vegjël. Sipas saj, foshnjat deri në moshën 6 muaj, që ushqehen vetëm me gji, nuk kanë nevojë për ujë shtesë, pasi qumështi i gjirit plotëson nevojat e tyre për hidratim. Ndërkohë, prindërit duhet të tregojnë kujdes me ruajtjen dhe përgatitjen e ushqimeve, pasi temperaturat e larta rrisin rrezikun e prishjes së tyre dhe të helmimeve ushqimore.
Dr. Çumashi këshillon njëherësh që personat që vuajnë nga diabeti, sëmundjet e zemrës apo çrregullime të shëndetit mendor të konsultohen me mjekun e familjes ose specialistin përkatës për të përballuar sa më mirë temperaturat e larta.
Në rast të komplikacioneve apo emergjencave shëndetësore, qytetarët duhet të kontaktojnë menjëherë Urgjencën Kombëtare në numrin 127.
