Shqipëria është vendi me nivelin më të lartë të privimit të rëndë material dhe social në Europë, s...
AKTUALITET
Bregdeti përgatitet për stuhi! Nga Durrësi, në Fier e Vlorë ngrihet alarmi! Pezullohen anijet
PiranjatPërditësimi i fundit 17 Nëntor 2025, 16:29
Në Vlorë, Fier dhe Durrës autoritetet po marrin masa për të përballuar reshjet me intensitet që pritet të bien në 48 orët e ardhshme.
Punonjës, specialistë dhe inxhinierë të Drejtorisë së Ujitjes dhe Kullimit në Qarkun e Fierit kanë kaluar në gjendje alerti pas parashikimeve për reshje gjatë ditëve në vijim. Zona të banuara si Hambari, Kashishti dhe Pishë Poro do të jenë nën monitorim të vazhdueshëm për të parandaluar vërshimet e lumit Vjosa.
Në prefekturën e Vlorës u mblodh sot Komisioni i Mbrojtjes Civile, për t’u koordinuar dhe ndarë detyrat konkrete çdo institucioni që të garantohet reagim i shpejtë në rast përkeqësimi të situatës. Në këtë takim është kërkuar me urgjencë ndërhyrja në digën e lumit Vjosë me hedhjen e inerteve ne digë, pasi Novosela mbetet më e rrezikuara nga përmbytjet.
Kushtet atmosferike janë përkeqësuar edhe në brigjet e Adriatikut duke ndikuar aktivitetin detar. Anijet e vogla dhe anijet e peshkimit kanë pezulluar lundrimet në Durrës e Vlorë. Tragetet e linjës Durrës-Bari që nisen në darkë, sipas Kapitenerisë, nuk do të kenë probleme, gjithsesi në këto kushte, flota e peshkimit ka pezulluar aktivitetin dhe ka marrë masat e nevojshme të sigurisë për të shmangur incidentet në kalata.
Sipas parashikimeve meteorologjike, pritet një javë me mot të paqëndrueshëm, që do të cenojë aktivitetin e peshkimit deri në fund të javës.
