Një qytetar denoncon pranë redaksisë së “Piranja News’ rrugën e re pranë spitalit të Lezhës, e cila duket se...
AKTUALITET
Detaje/ Vdekja e 25-vjeçares angleze në Durrës, ja çfarë dyshon policia
PiranjatPërditësimi i fundit 9 Tetor 2026, 16:57
Detaje të reja dalin në dritë lidhur me vdekjen e 25-vjeçares britanike Ferne Josephine King, e cila u gjet e pajetë në apartamentin që kishte marrë me qira në Durrës, ku po qëndronte me vajzën e saj 2-vjeçare.
Sipas të dhënave paraprake nga ekspertiza mjeko-ligjore, në trupin e së resë nuk janë evidentuar shenja të jashtme dhune, ndërsa dyshimet fillestare orientohen drejt një problemi të mundshëm shëndetësor.
Burime nga Policia bëjnë me dije se një nga pistat që po shqyrtohet është mundësia që 25-vjeçarja të ketë pësuar infarkt. Gjatë ekzaminimit të trupit është vërejtur edhe një sasi e vogël gjaku që i kishte dalë nga hundët, por deri më tani nuk ka një përfundim zyrtar mbi shkakun e vdekjes.
Për të hedhur dritë mbi rrethanat e ngjarjes, mostrat biologjike janë dërguar në laboratorin e Tiranës për analiza toksikologjike, ndërsa priten edhe rezultatet përfundimtare të autopsisë.
E reja kishte ardhur në Shqipëri disa ditë para ngjarjes, së bashku me vajzën e saj të mitur. Ajo kishte prenotuar përmes platformës Airbnb një apartament në rrugën “Taulantia”, pranë Muzeut Arkeologjik në Durrës, ku planifikonte të qëndronte për tri ditë.
Ngjarja u zbulua rreth mesditës, kur pastruesja e apartamentit mbërriti në ambient për të kryer pastrimin pas përfundimit të periudhës së rezervimit. Ajo e gjeti 25-vjeçaren të pajetë në shtrat, ndërsa pranë saj ndodhej vajza e vogël.
Pas konstatimit të situatës, gruaja njoftoi menjëherë shërbimin e urgjencës. Ekipi mjekësor mbërriti në vendngjarje dhe konfirmoi vdekjen, ndërsa më pas u njoftua edhe Policia.
Sipas informacioneve paraprake, vajza 2-vjeçare ishte në gjendje të mirë shëndetësore. Pas ngjarjes, ajo u mor në mbrojtje nga shërbimet sociale dhe u dërgua në një qendër sociale në Tiranë, ku do të kujdesen për të deri në vijimin e procedurave përkatëse.
Për rastin është vënë në dijeni edhe Ambasada Britanike në Tiranë, e cila po ndjek komunikimin me familjarët e së ndjerës dhe hapat e mëtejshëm që lidhen me rastin.
Deri në këtë fazë të hetimeve, Policia nuk ka evidentuar të dhëna që të sugjerojnë përfshirjen e një vepre penale në vdekjen e 25-vjeçares. Megjithatë, shkaku përfundimtar mbetet ende i papërcaktuar dhe pritet të sqarohet pas përfundimit të ekspertizës mjeko-ligjore dhe analizave laboratorike.
