Një individ me një të kaluar shumë të dyshimtë, i cili nga njëra anë fuste lugën, në tjetrën garuzhden,...
BOTA
Katania, pse është një qytet i rëndësishëm për trafikantët e drogës në Amerikën e Jugut
PiranjatPërditësimi i fundit 24 Prill 2023, 16:10
Një ngarkesë prej dy tonësh kokainë u zbulua nga deti në Katania, Sicili këtë javë. Ishin 70 pako të lidhura me rrjeta që notonin dhe në qendër kishte një sinjal drite. Guardia di Finanza shpjegoi se ishte "një nga konfiskimet më të mëdha të kryera ndonjëherë në territorin italian" dhe se ngarkesa, sapo të dilte në treg, do t'i kishte dhënë trafikantëve rreth 400 milionë euro fitim. 70 pako përmbanin 1600 blloqe kokaine të ruajtura në ambalazh të papërshkueshëm nga uji.
Katania, si për rrugët detare dhe ajrore, është bërë prej kohësh një pikë e rëndësishme mbërritjeje për dërgesat e mëdha të drogës që ndjekin rrugët lidhëse midis Amerikës së Jugut, Afrikës së Veriut dhe Siçilisë.
Për sa i përket qarkullimit që kryhet nga deti, pakot e drogës lihen në det të hapur, prandaj koordinatat që tregojnë pozicionin e saktë të ngarkesës i dërgohen kujtdo që duhet ta rikuperojë.
Më pas, nga bregu lëvizin motobarkat në det, pra motobarka të afta për të shkuar në det të hapur, të cilat përfundojnë operacionin në një kohë të shkurtër dhe me pak rrezik. Megjithatë, kjo nuk është metoda e vetme e përdorur nga bandat kriminale që tregtojnë drogë.
Në tetor 2022, njëqind e dhjetë kilogramë kokainë u kapën në portin e Katanias, brenda një kontejneri me fruta tropikale të ardhur nga Ekuadori. Ngarkesa të tjera u kapën gjithashtu në aeroportin Fontanarossa të Katanias.
Qysh në vitin 2021, Drejtoria e Hetimit Anti-Mafia (DIA), shkroi në raportin e saj gjashtë mujor se operacionet e policisë kishin bërë të mundur "përqendrimin në atë se si provinca e Etna-s [Katania], është bërë një qendër vendimtare për importimin e drogës nga Amerika e Jugut.
Struktura kriminale, e organizuar mirë dhe e lidhur me kartelin Sinaloa, përveç trafikut të drogës, ishte e përkushtuar për kryerjen e krimeve të shumta satelitore nëpërmjet një grupi aktiv në Itali, Spanjë dhe Amerikën Latine”.
Sipas Dia-s, është e arsyeshme të pyesim nëse konsorciumet mafioze siciliane, të përhapura në territor dhe të insinuaruara në të gjithë mekanizmat e prodhimit legal dhe të paligjshëm, mund të pranojnë veprimtarinë e grupeve kriminale të dedikuara për krime që përkojnë me interesat e tyre tipike.
Në praktikë, sipas DIA-s, ekziston një aleancë mes bandave mafioze siciliane dhe trafikantëve të drogës nga Amerika e Jugut.
Vitet e fundit, mafia e Katanias ka marrë një rol gjithnjë e më të rëndësishëm te organizata “Cosa Nostra”, mafia siciliane, duke përfituar nga dobësimi i klaneve të Palermos.
Mafia e Katanias është bërë aleate me disa grupe si “Ndranghetta” kalabreze, me klanet e “Camorra”-s napolitane dhe me grupe kriminale shqiptare.
Dhe në fund të këtij zinxhiri criminal, janë edhe grupet e narko-trafikantët e Amerikës së Jugut, në veçanti karteli meksikan i “Sinaloa”-s, një nga organizatat kriminale më të fuqishme në botë, e cila nga Meksika ka shtrirë ndikimin e saj në të gjithë Amerikën e Jugut dhe Evropë.
Sipas Dia-s, janë familjet mafioze që kanë qenë gjithmonë hegjemoniste në zonën e Katanias: Santapaolas, Ercolanos, Mazzei, La Roccas, Lamaccas, ato që menaxhojnë marrëdhëniet me organizatat e tjera kriminale dhe për këtë arsye janë vendosur në rrugët e trafikut të drogës.
Sipas Carmelo Zuccaro-s, Prokurori Antimafia në Katania, Santapaola-Ercolanos "kanë lidhje me shoqatat kundërshtare mafioze në të njëjtën zonë", në disa raste duke arritur "marrëveshje të përbashkëta në menaxhimin e aktiviteteve të paligjshme dhe, në përgjithësi, në infiltrimin të strukturës së biznesit”.
Në anën e kundërt të paktit criminal, është “Karteli Sinaloa”. I themeluar në vitet 1960, ai u shfaq si organizata dominuese e trafikut të drogës në vitet 1980 dhe 1990 kur u komandua nga Ernesto Fonseca Carrillo, i njohur si "Don Neto", Miguel Angel Felix Gallardo, i njohur si "El Jefe de Jefes", Amado Carrillo.
Fuentes, i njohur si “El Señor de los Cielos” dhe mbi të gjitha nga Joaquin Archivaldo Guzman Loera, i njohur si “El Chapo”, djemtë e të cilit vazhdojnë të luajnë role të rëndësishme në organizatën kriminale.
Tani, në krye të organizatës është Ismael Zambada Garcia, i njohur si “El Mayo” ose “Don Ismael”. Sipas sajtit të gazetarisë investigative Insight Crime, "El Mayo" filloi të merrej me drogë në fund të viteve 1970.
Ai është trafikanti i fundit i mbetur i drogës i të ashtuquajturës “gardë e vjetër”, më jetëgjatësi mes drejtuesve ende të lirë.
Megjithatë, nuk është vetë “El Mayo” që u lidh me mafien e Katanias. Këtë e ka bërë togeri i tij, José Angel Riviera Zazueta, i njohur si “El Flaco”.
Në vitin 2019, prania e tij u raportua në Katania, më pas u transferua në Romë dhe në fund u kthye në Meksikë.
Menjëherë më pas, sipas rindërtimit të Guardia di Finanza-s, dy nga emisarët e tij mbërritën në Katania: Daniel Esteban Ortega Ubeda, i njohur si "Tito", 35 vjeç dhe Felix Ruben Villagran Lopez, i njohur si "Felix", 48 vjeç.
Gjithashtu sipas Guardia di Finanza-s, dy emisarët kanë bashkëpunuar ngushtë me një meksikan në Kolumbi, Luis Ferdinando Morales Hernandez, i njohur si "El Suegro", i ngarkuar për përgatitjen e ngarkesave që ishin destinuar për në aeroportin e Katanias nga Kolumbia.
Këtu ishte një njeri i besuar i kartelit, i njohur nga trafikantët e drogës si "Don Señor". Të gjitha komunikimet mes dy emisarëve të mbërritur në Katania nga Kolumbia, “Don Señor” dhe drejtuesve të organizatës, u përgjuan.
Dy emisarët në Katania, në biseda telefonike iu drejtuan “Flacos”, duke e quajtur “Zoti im”.
Plani, i cili u zbulua nga Guardia di Finanza në vitin 2019, parashikonte që një aeroplan privat që nisej nga Meksiko Siti, të ndalonte në Kartagjena, Kolumbi, ku do të ngarkohej droga dhe më pas të fluturonte për në Katania, duke bërë një ndalesë për karburant në Capo Green. Ngarkesa e pritshme ishte rreth 300 kilogramë kokainë.
Dërgesa u nis në tetor 2019 pas një sërë vonesash për shkak të problemeve organizative dhe përbëhej nga 406 kilogramë kokainë.
Megjithatë, ishte një dërgesë e ashtuquajtur e kontrolluar: do të thotë se e gjithë dërgesa nga Kolumbia në Katania u ndoq nga Guardia di Finanza, në bashkëpunim me policinë kolumbiane kundër drogës. Pastaj në Katania, ngarkesa u zhvendos në një magazinë në periferi që ishte identifikuar nga "Don Señor".
Këtij të fundit, si pagesë i janë dhënë 32 pako drogë. Mes blerësve që prisnin mbërritjen e drogës, ishte edhe një ndërmjetës italian, i njohur si “Charlie”.
Ai quhet Mauro Da Fiume dyhe ishte paraqitur në dokumentet e hetimeve të tjera sepse ishte i lidhur me familjen 'Ndrangheta' të Piromalli-t.
Nofka rrjedh nga një kompani import-eksporti që Da Fiume menaxhonte në Barcelonë, “Charlie Export”.
Da Fiume dhe të dërguarit e "Flaco"-s, në emër të kartelit “Sinaloa” do të takoheshin në Verona, më pas takimi u zhvendos në Milano.
Ishte në atë moment që Guardia di Finanza ndërhyri, duke i arrestuar të dy, Da Fiume-n dhe emisarët e kartelit meksikan në shkurt 2020.
Asnjëherë nuk dihej se në emër të kujt po blinte drogën Da Fiume. Por këto arrestime nuk e ndërprenë trafikun e drogës që vinte nga Amerika e Jugut në Katania, ende e konsideruar si pikë e privilegjuar e mbërritjes nga organizatat kriminale të Amerikës Latine.
Burimi: "Il Post"; Përshtati në shqip: Gazeta “Si”
