Inspektorati i Lartë i Deklarimit dhe Kontrollit të Pasurive dhe Konfliktit të Interesit (ILDKPKI) raporton se gjatë vitit 2025 ka vijuar ...
AKTUALITET
Kulla 35 kate në Shkodër bën bashkë Komunitetin Mysliman dhe atë Ortodoks: Po na grabitet prona! 35 vite nëpër gjyqe
PiranjatPërditësimi i fundit 13 Tetor 2025, 10:47
Myftiu i Shkodrës, Muhamed Sytari ka pritur në një takim drejtuesit e kishës ortodokse atje, Aleksandër Petani dhe Nikolla Petani për të kundërshtuar ndërtimin e kullës prej 35 katesh në qendër të qytetit verior.
“Dekadat e fundit kemi një problem të madh, të cilin e ndjekim sesi zhvillohet. Institucionet nuk i japin zgjidhje problemit të pronës tek hotel "Rozafa". Nuk kemi dijeni për ndërtimin e kullës. Kjo është e papranueshme. Jemi të angazhuar në gjyqe dhe shkresa të ndryshme. Kemi fituar gjyqet. Më vjen keq që elementë të caktuar të qytetit e përdorin këtë situatë për të mbjellë urrejtje fetare. Thërrasim drejt respektimit të pronës. Nuk tërhiqemi pa fituar të drejtën tonë. Jemi në pozitën e atij që lufton me atë që ka në dorë. Kemi të bëjmë me rigrabitje të pronës tonë dhe këtë e lejon shteti. Sot në zemër të Shkodrës po ndodh grabitje flagrante. 35 vite pas rënies së komunizmit dhe shihni çfarë flasim sot. Protestë? Çdo gjë në kohën e vetë, ka më shumë se protesta, brenda kuadrit ligjor”, ka deklaruar Syrtari.
Sakaq, At Aleksandër Petani thotë se pronat po grabiten. “Jemi 35 vite në gjyqe, jemi lodhur aq shumë. Feja dhe prona po grabiten nga njerëz që nuk i njohim. Gjykata kushtetuese na ka dhënë të drejtë”, ka deklaruar ai.
Hotel “Turizmi”, i njohur sot si “Rozafa”, u ndërtua në qytetin e Shkodrës në fillim të viteve ’70. Hoteli 8-katësh është i pozicionuar në një kryqëzim strategjik të qytetit dhe ndodhet pranë lagjes muzeale të tij.
Pas rënies së komunizmit në fillim të viteve ’90, hoteli iu dha një grupi prej 40 ish-të përndjekurish politikë përmes një vendimi kontrovers të qeverisë së kohës. Vendimi i qeverisë për transferimin e hotelit u rrëzua nga Gjykata Kushtetuese një muaj më pas, por pavarësisht vendimit, hoteli u privatizua përfundimisht në vitin 1996. Në vitin 1995, edhe Kisha Ortodokse u njoh pronare e 2633 metrave të tjerë në kufi, ndërsa Komiteti Mysliman u njoh pronar i 2 mijë metrave.
