Një nënë nga Korça, Volsjana Plasa, denoncon se djali i saj 4-vjeçar është dhunuar nga edukatorja në kopshtin nr. ...
AKTUALITET
MCAA solidarizohet me akademikët shqiptarë dhe mbështet protestat: Arsimi dhe shkenca në krizë të thellë
PiranjatPërditësimi i fundit 19 Qershor 2026, 18:54
Marie Curie Alumni Association (MCAA), një nga rrjetet më të mëdha ndërkombëtare të studiuesve dhe shkencëtarëve me mbi 24 mijë anëtarë në më shumë se 155 vende të botës, ka shprehur solidaritetin e saj me akademikët shqiptarë të diasporës dhe me protestën qytetare që po zhvillohet në Shqipëri.
Në një deklaratë publike të datës 19 qershor 2026, organizata mbështet qëndrimin e mbi 120 akademikëve dhe intelektualëve shqiptarë që jetojnë dhe punojnë në vende të ndryshme të botës, të cilët kanë dalë në mbështetje të kërkesave të protestuesve për një “Shqipëri të re”.
Akademikët vlerësojnë si legjitime kërkesat për një qeverisje më transparente, më të përgjegjshme dhe më të drejtë, si dhe për institucione që t’u shërbejnë qytetarëve dhe jo interesave të pushtetit.
Sipas deklaratës së tyre, kriza që po përjeton vendi nuk është vetëm politike, por lidhet ngushtë edhe me gjendjen e arsimit të lartë, kërkimit shkencor dhe inovacionit. Ata theksojnë se nënfinancimi kronik i sektorit, dobësimi i integritetit akademik dhe mungesa e politikave afatgjata për zhvillimin e dijes kanë nxitur largimin e vazhdueshëm të studiuesve dhe profesionistëve shqiptarë jashtë vendit.
Edhe MCAA ndan të njëjtin shqetësim, duke vlerësuar se protestat qytetare pasqyrojnë një pakënaqësi të thellë ndaj mënyrës së qeverisjes dhe një lodhje në rritje të qytetarëve. Organizata thekson se dobësimi i sistemit të arsimit, kërkimit shkencor dhe inovacionit përbën një nga sfidat më serioze për zhvillimin afatgjatë të Shqipërisë.
Deklarata e akademikëve dhe mbështetja e një organizate prestigjioze ndërkombëtare si MCAA vijnë në një moment kur debati mbi reformimin e institucioneve, cilësinë e arsimit dhe frenimin e emigrimit të trurit po zë një vend gjithnjë e më të rëndësishëm në diskursin publik shqiptar.
