Gjykata e Tiranës ka caktuar masën e sigurisë detyrim paraqitjeje për 18 persona të arrestuar gjatë protestave në Tiran&eum...
AKTUALITET
“Nelsa shpk”, kompania që furnizoi kopshtin ku u helmuan 70 fëmijë në Gramsh, furnizues edhe për spitalet e burgjet
n.fPërditësimi i fundit 24 Maj 2025, 23:11
GRAMSH- Rreth 70 fëmijë të një kopshti publik në qytetin e Gramshit, janë helmuar dhe janë paraqitur në urgjencën e spitali me temperaturë dhe te vjella. Dyshohet se shkak i helmimit ka qenë bakteri salmonela. Ende nuk është përcaktuar saktë shkaku ndërsa analizat laboratorike janë ende në proces për të konfirmuar burimin dhe shkallën e kontaminimit.
Një nga pistat kryesore të hetimit është furnizuesi i ushqimeve me katering për kopshtin. Mësohet se furnizuesi i ushqimit me katering është kompania “Nelsa shpk”. Kopshti mësohet se ka një kontratë me një operator privat për përgatitjen dhe shpërndarjen e ushqimit. Ky subjekt dyshohet se ka rezultuar më parë me shkelje të rregullave higjeno-sanitare gjatë një inspektimi të AKU-së në vitin 2023, por ka vijuar të operojë normalisht.
Në kuzhinën e kopshtit nuk kishte frigoriferë funksionalë për ruajtjen e produkteve të ndjeshme si mishi dhe qumështi një fakt i konstatuar edhe nga specialistë të AKU-së që kanë ndërhyrë pas incidentit. Në lidhje me ngjarjen mësohet se është ngritur një grup pune e përbërë nga disa inspektorë higjene. Ata po ndjekin situatën e referuar nga Spitali i Gramshit.
Përveç furnizimit me ushqime katering të çerdheve, kopshteve dhe konviktit të shkollës së mesme në bashkinë Gramsh, “Nelsa shpk” furnizon me ushqime dhe spitalet e burgjet. “Nelsa shpk” rezulton të jetë aktualisht në pronësi të Elsa Kamberi (Balla), por themelues dhe pronar fillestar është babai i saj, Nexhmi Balla, një emër i njohur për drejtësinë shqiptare. Në vitin 2016, Balla u arrestua së bashku me disa biznesmenë të tjerë dhe zyrtarë të lartë të burgjeve për një skandal të madh korrupsioni që përfshinte manipulimin e tenderëve për ushqimin në Drejtorinë e Përgjithshme të Burgjeve.
Përveç Nexhmi Ballës, në pranga ranë edhe biznesmenët Ylber Kalaja dhe Shemsi Sinani, si dhe drejtori i përgjithshëm i burgjeve në atë kohë, Artur Zoto, dhe zëvendësi i tij Iljaz Labi. Kompanitë e tyre kishin ndarë mes tyre tenderë me vlera të mëdha, përmes skemave korruptive. Pas këtij skandali, Balla i kaloi pronësinë dhe drejtimin e kompanisë vajzës së tij, Elsës.
